DILI, 11 janeiru 2024 (TATOLI) – Diretór Klínika Hospitál Nasionál Guidu Valadares (HNGV), Marcelino Correia, hateten Ministra Saúde Elia dos Reis Amaral ezonera ona diretór na’in-haat iha ospitál nasionál.
“Ministériu Saúde ezonera ami na’in haat ne’e ami mós la hatene, tanba la bolu atu fó hatene ami direta ka bolu ami konsellu atu fó hatene maibé derpente de’it ami haree karta ezonerasaun ne’e virál iha media sosiál ka whatsap, entaun iha ne’e mak ami haree ami na’in haat hetan ezonerasaun”, Marcelio Correia informa ba jornalista sira iha nia kna’ar fatin HNGV, ohin.
Nia hateten, diretór na’in-haat ne’e mak Diretór Apoiu Lojístika, Diretór ba Apoiu Diagnóstiku Therapeútika, Diretór Asisisténsia Klínika no mós Diretór ba Enfermajen Parteira.
“Ami na’in haat mak hetan karta ezonerasaun, entaun karta ne’e ami haree katak ministra hasai iha loron 8 fulan janeiru 2024, no ema ne’ebé mak troka ami iha ona tanba ne’e ami hein de’it, ami prontu ona atu entrega servisu ba sira atu sira bele kontinua nafatin servisu, oinsá bele lori atendimentu saúde ba komunidade sira ho di’ak”, nia esplika.
Nia afirma, hanesan profisionál saúde prontu koopera ho Ministériu Saúde atu halao’o servisu ka fó atendimentu ba populasaun sira iha Timor-Leste.
“Ami hanesan instituisaun ida ne’ebé mak tutela ba MS prontu nafatin atu koopera oinsáa bele servisu fó atendimentu ba populasaun ho di’ak liután”, nia haktuir.
Nia rekomenda ba konsellu mak tenke servisu ho profisionál, atu populasaun bele simu atendimentu ho di’ak liután.
Konsellu Diretivu foun HNGV foun ne’ebé Ministra Saúde Elia dos Reis Amaral nomea mak Xara Maria Xavier nu’udar Diretora Servisu Administrasaun no Finansas, Ana Maria Magno nu’udar Diretora Asisténsia Klínika, Vidal de Jesus Lopez nu’udar Diretór Servisu Apoiu Diagnóstiku Therapeútiku, Maximiniana L.S. Ferão nu’udar Diretora Servisu Enfermajen.
Jornalista : Feliciadde Ximenes
Editór : Zezito Silva
