Sosiedade sivil vizita sítiu istóriku Nicolau Lobato ho la’o ain
TURUSKAI, 11 janeiru 2024 (TATOLI) – Sosiedade Sivil hotu iha territóriu nasionál ne’ebé organiza hosi FONGTIL no HAK realiza marsa la’o ain hosi Turiskai-Vila ba Mindelu ho objetivu atu vizita fatin istóriku, ‘’mate fatin’’ Prezidente Nicolau dos Reis Lobato.
“Atividade la’o ain mai iha fatin ida-ne’e ho ita nia Sosiedade Sivil iha munisípiu hotu ho marsa mai iha fatin ita-nia Saudozu Prezidente Nicolau Lobato nia mate fatin atu nune’e ema hotu bele haree no rona direta istória hosi sasin moris sira nian kona-ba prosesu sira iha ne’e to’o ita-nia saudozu husik iis hosi inimigu sira”, Diretor Ezekutivu FONGTIL Valentim da Costa Pinto ba jornalista sira iha Mindelu, ohin.
Nia dehan, program ida-ne’e atu haforsa liután sidadaun hotu nia nasionalizmu hodi valoriza ita nia luta na’in sira nia luta durante ne’e.
“Vizita ne’e ita konsidera hanesan vizita istórika mai ho karaterístika hakarak haforsa ita-nia valorizasaun ba luta na’in sira, nune’e atu reforsa liután ukun na’in sira liuliu Ministériu Turizmu atu bele promove fatin ne’e sai hanesan sítiu turizmu ida ne’ebé permite ema hotu bele mai vizita no koñese di’ak liután kona-ba fatin istóriku ne’e, ho nune’e mak tinan ida-ne’e ami konvida membru hotu halo sakrifisiu la’o ain mai to’o iha fatin ne’e”, nia afirma.
Iha sorin seluk, Diretór Asosiasun HAK, Feliciano da Costa Araujo, dehan hanesan membru ba FONGTIL haree katak tenke tau importánsia ona ba sítiu istóriku sira ne’ebé ho nia valór boot ba jerasaun ba jerasaun no ezije ba Governu Indonézia no Timor-Leste atu tur hamutuk hodi diskute kona-ba restu mortais Saudozu Nicolau Lobato nian ne’ebé to’o ohin loron seidauk hetan.
“Vizita ida-ne’e ho objetivu atu fanun ita-nia Governu oinsa halo diskusaun ho Governu Indonézia hodi hatudu lalais ita-nia Saudozu nia restu mortais to’o agora sira tau iha ne’ebé, ami sei la nonok ho oportunidade ne’e ami ezije nafatin”, Feliciano afirma.
Atividade la’o ain ne’e hahú tuku 07:00 dader, sai hosi Turiskai-Vila ba to’o iha foho Osnako iha tuku 12:00 ekipa, tama iha uma-lisan Osnako Berbui ema hotu ne’ebé la’o ain sei tama hetan kuta hosi katuas lia-na’in hafoin kontinua viajen ba saudozu nia fatin mate Mindelu iha tuku 13:30 no to’o iha Mindelu tuku 15:00.
Bainhira to’o iha Mindelu ekipa hotu ne’ebé organiza hosi FONGTIL karii ai-funan no sunu lilin iha saudozu nia mate fatin no sunu lilin no fila hikas mai Turiskai-Vila.
Jornalista: Hortencio Sanchez
Editór : Zezito Silva
