Xefe Suku Orana preokupa Empreza Superjaya abandona projetu eletrifikasaun
TURISCAI, 11 janeiru 2024 (TATOLI) – Xefe Suku Orana, Postu Administrativu Turiscai, Munisípiu Manufahi, Domingos de Jesus Nunes, hatete Empreza Superjaya ne’ebé kaer projetu eletrifikasaun abandona servisu no to’o ohin loron komunidade iha suku referidu seidauk asesu ba enerjia elétrika.
“Ha’u nia suku to’o ohin loron eletrisidade ida mós seidauk lakan, kompaña ba harii ona eletrisidade nia rin maibé to’o ohin loron la kontinua projetu ne’e”, Xefe Suku ne’e ba Agência TATOLI iha Mindelu, ohin.
Tanba ne’e, nia husu ba Governu atu haree no fó sansaun ba empreza no buka fali empreza seluk hodi troka tanba la iha kapasiade atu kaer projetu ne’e.
“Kompaña ne’ebé kaer projetu ne’e naran Superjaya, to’o ohin loron nia abandona totál, nunka atu ba haree mós la iha, ida-ne’e difikulta tebes ha’u nia suku hodi la asesu ba eletrisidade”, nia dehan.
Ho situasaun ne’e, Agência TATOLI foti kedan númeru kontatu hosi empreza no telefone direta no mensajen liuhosi WhatsApp maibé la ativu hotu.
Suku Orana kompostu hosi Aldeia hamutuk tolu mak, Orana, Teberai no Fatulelo ho nia populasaun hamutuk 875.
Jornalista: Hortencio Sanchez
Editór : Zezito Silva
