iklan

DEFEZA, HEADLINE

Horta husu Governu tenke tau atensaun ba Komponente Navál

Horta husu Governu tenke tau atensaun ba Komponente Navál

Prezidente Repúblika, José Ramos-Horta. Imajen Tatoli/Egas Cristóvão

DILI, 12 janeiru 2024 (TATOLI) – Prezidente Repúblika, José Ramos Horta, husu ba Governu atu tau atensaun ba Komponente Navál espesialmente apoiu ba fasilidade ho objetivu atu bele dezenvolve di’ak liután no bele prevene peska illegál.

Xefe Estadu Horta katak dezenvolvolvimentu instituisaun forsa armada la haree ba númeru kuantidade membru forsa armada. Ezemplu; forsa tenke ho númeru 500 ka 300.000 maibé forsa atu dezenvolve di’ak liu ne’e haree hosi fasilidade lojístika no manutensaun ba fasilidade sira  ne’ebé agora daudaun iha hela.

“Ha’u-nia mensajen mak ne’e, ha’u uluk sei hanesan Ministru Negósiu Estranjeiru Kooperasaun no iha ha’u-nia Primeira Prezidénsia ha’u hateten katak kuandu ita halo instituisaun militár no polísia no ita atu dezenvolve ne’e ita tenke tau atensaun ba parte lojístika parte manutensaun atu sai efetividade forsa tantu mós polísia”, José Ramos Horta hateten ba jornalista sira hafoin prezide aniversáriu Komponente Navál iha baze Navál Hera, sesta ne’e.

“Ha’u hanoin Governu tenke halo ida-ne’e, tenke tau atensaun hodi investe ba parte lojístika militár atu instituisaun ne’e bele dezenvolve di’ak liután no Governu mós tenke haree ba formasaun ba rekursu atu militár bele profisional”, nia adianta.

Horta hateten, tema ba aniversáriu komponente navál iha tinan ne’e mak “Navál Forte, Tasi Seguru”, tanba ne’e tenke fó importánsia ba mós Komponente Navál hodi asegura seguransa marítima Timor-Leste nian.

“Nasaun hanesan illa ida, protesaun no prezervasaun ba ita-nia rekursu tasi nian importante tebes ba seguransa no ba dezenvolvimentu sustentável no prosperidade ita-nia povu nian”, nia afirma.

Nia hateten, Komponente Navál sei enfreta dezafiu iha rekursu finanseiru, tékniku no rekursu umanu ne’ebé limitadu, maibé atu rezolve kestaun hirak-ne’e importante tebes atu asegura seguransa no prosperidade Timor-Leste nian.

“Ita presiza hametin kooperasaun rejionál, fatór esensiál ida hodi hasoru ameasa marítima nian hanesan pirasia, kontra bandu, tráfiku umanu, kilat no droga. Tenke enkoraja no fasilita ezersísiu konjunta, fahe informasaun no kolaborasaun iha operasaun seguransa marítima atu bele halakon ita-nia falta rekursu”, nia hateten.

Xefe Estadu kongratula forsa armadas liuhosi aniversáriu Komponente Navál ba dala 22 tinan ne’e, forsa atu kontinua hodi hatudu maturidade hodi sai profisionál liután.

“Ha’u hato’o parabens ba Forsa Armadas liuliu Komponente Navál ne’ebé ohin halo nia aniversariu ba dala 22, kontinua hatudu maturidade hodi sai profisionál liután”, nia  kongratula.

Xefe Estadu Maiór Forsa Armadas FALINTIL-Forsa Defeza Timor-Leste (F-FDTL), Domingos Raul Falur Rate Laek,hatoo parabens ba forsa navál ne’ebé selebra aniversariu ejieténsia ba dala 22 husu forsa armada atukontinia servisu ho  disipliña no matoridade profisionaliza aan hodi forsa profisionál iha futuru.

“Ha’u hato’o parabens ba imi hotu forsa komponente navál tenke hatudu lealidade profisionalizmu hodi sai forsa profisionál ne’ebé di’ak. Hatudu imi nia desempeñu servisu tanba balun iha ne’e sei hanesan estajiu karik imi halo sala Komandu sei la tolera hodi  halo sansaun disipiñar hasoru imi  no bele hasaiimi hosi instuisaun militár,”

Komandante Komponente Navál Komodoro Higinio da Costa, hato’o parabens ba forsa Komponente Navál ne’ebé  halo tinan ba ejisténsia dala-22  maske ho difikuldade oinoin maibé membru F-FDTL Komponente Navál kontinua hatudu nia dedikasaun no loyaldade hodi servi povu no nasaun.

Jornalista: Natalino Costa

Editór : Zezito Silva

 

iklan
iklan

Leave a Reply

iklan
error: Content is protected !!