DILI, 12 janeiru 2024 (TATOLI)—Sekretáriu Estadu Asuntu Toponímia no Organziasaun Urbana (SEATOU), Germano Santa Brites, hateten lixu kontinua namkari iha sidade Dili la’ós tanba hapara traballadór saneamentu maibé sidadaun mak laiha konsiénsia hodi soe lixu arbiru.
“Lixu ne’ebé namkari iha sidade Dili la’ós tan hapara traballadór ne’e lae, maibé ita ida soe lixu ne’e mak la kuidadu no laiha konsiénsia. Ami avizu tama-sai bairru katak lixu tau iha ida-idak nia saku depois mak tau iha lixeira ne’ebé Governu prepara. Maibé saida mak komunidade kontribui, udan lixu para hotu iha tasi laran no mota depois hakilar dehan Estadu ho Governu dukur, la tau-matan,” SEATOU dehan jornalista sira, hafoin sobu família haat nia uma iha suku Madohi, sesta ne’e.
Nia husu komunidade hotu-hotu atu kontribui ba sidade moos no matak mak labele husik foer tuir bee-dalan, mota no tasi tanba hosi ne’e mak sei fó fila impaktu negativu mak mosu moras oioin.
“Soe arbiru mak hamosu moras ba traballadór ne’ebé raut foer inklui ba ita-nia aan rasik,” nia dehan.
Tuir estudu hosi Bandu Aziatiku Dezenvolvimentu, loroloron iha Dili prodús lixu liu tonelada 200 iha ne’ebé 45% soe iha lixeira Tíbar, 33% sunu, 6% hakoi no restantes soe ba valeta kuak, mota no tasi.
Jornalista : Osória Marques
Editór : Cancio Ximenes
