MANATUTO, 12 janeiru 2024 (TATOLI)— Governu liu husi Ministeriu Administrasaun Estatal (MAE) fó ona pose ba Luís Inacio Henrique Fernandes hodi troka Bernarndo Lopes lidera kargu hanesan Prezidente Autoridade Munisipíu Manatuto.
Governu liuhosi Ministériu Administrasaun Estatál (MAE), tuir despasu númeru 02/GPM/1/2024, ne’ebé públika ona iha Jornál Repúbliku hodi nomea Luís Inacio Henrique Fernandes hodi assume kargu nu’udar Prezidente Autoridade Munisípiu Manututo hodi troka Prezidente Autoridade Munisípiu Manatuto sesante, Bernardo Lopes.
Ho nomeasaun, ohin Ministru Administrasaun Estatál, Tomas do Rosário Gabrál fó pose ba Prezidente Auottoridade Munisípiu Manututo ho nia tema mak hanesan “Impulsionar a Descentralização para promover a Coesão territorial”.
“Onra bo’ot nu’udar Manatuto oan ohin simu konfiansa husi govenru sental hanesan PAM Manatuto ne’ebe ha’u sei halao ho responsabildiade hodi tane no servi fiar ne’ebé fó mai ha’u. Agradese ba Primeiru Ministru, Xanana Gusmão deposita konfiansa mai hau no iha fatin ne’e ho partisipasaun povu Manatuto hau simu imi nia fiar tomak mai hanesan PAM,” Luís Inacio Henrique Fernandes iha nia diskursu iha salaun Parókiál Santo António, sesta ne’e.
Luis Fernandes hato’o agradese ba lider sesante no kompremete sei servisu hamutuk ho estrutura foun hosi servi povu Manatuto, hatu’ur prospriedade, hatu’ur no asegura programa no politika governu nian hodi lori Manatuto sai munisipiu desenvolvidu.
“Manatuto iha potensia rikusoin bo’ot tebes, potensia minerais no paizajen furak husi tasi to foho ne’ebe hein hela desenvolvimentu. Durante periodu ida ne’e ha’u hakarak lori objetivu desenvolvimentu Manatuto iha parte tolu mak hanesan, Kapital Umanu, Hari’i Infraestutura no Desenvolvimentu Ekonomia, Manatuto ba Manatuto oan tomak, ” nia esplika.
Ministru Administrasuan Estatal, Tomás do Rosario Cabral husu ba makna’ar nain sira foin simu pose hodi hakru’uk nafatin ba lei no rona tuir orientasaun husi PAM hanesan autoridade iha munisipiu ida.
“Ohin ita bo’ot sira halo juramentu iha Amo nian oin katak laiha ema ida kontra autoridade, se’e mak la obedese presiza hases lai tanba povu presiza desenvolvimentu. Hahu ohin ba oin Prezidente PAM iha autoridade organiza ita boot sira, faze primeiru ba ita mak imi mak sei hahu hodi halo servisu instalasaun lokal,” Governante ne’e deklara.
Governante ne’e husu nafatin ba PAM Manatuto ho nia membru sira bele garante servisu diak durante tinan tolu nia laran hodi hatudu prestasaun no lori desenvolvimentu ba povu tomak.
MAE mos iha fatin hanesan fó pose ba Sekretáriu Munisipál, Diretór Munisipál sira no Administradór Postu Administrativu sira, ne’ebé pertense ba munisípiu Manatuto hanesan Laleia lidera husi Francisco Jacinto Ximenes, Soibada husi Terezinha da Costa Moniz, Natabora husi José Ramos, Laklubar husi Evaristo dos Reis Sarmento no Manatuto Vila husi José da Cunha.
Jornalista : Cidalia Fátima
Editora : Armandina Moniz
