DILI, 12 janeiru 2024 (TATOLI)—Parlamentu Nasionál (PN) iha posibilidade sei halakon Konsellu Konsultivu Fundu Petrolíferu (KKFP).
Sekretária Meza PN, Deputada Virginia Ana Belo, hateten reuniaun lídér bankada iha kinta (11 janeiru 2023) ne’e diskute ajenda plenária hodi ko’alia kona-ba membru KKFP, maibé PN sei rona fila-fali sira hodi haree iha posibilidade KKFP iha PN ninian atu halakon maibé sei halo konsulta ho sira.
“Tanba, KKFP ne’e ninia natureza loloos ne’e bainhira PN iha lejislatura dahuluk asembleia konstituente nia kriasaun ba ida-ne’e. Ho hanoin ida KKFP membru sira iha laran ne’e mak eis titulár hanesan eis Prezidente Repúblika, eis Primeiru-Ministru, eis Prezidente Parlamentu Nasionál, maibé realidade hahú hosi nia funsaun to’o agora laiha ema sira-ne’e no ema sira-ne’e delega fali sira ninia reprezentante mak mai,” Sekretária Meza PN ne’e hateten ba jornalista sira iha uma fukun PN.
Entaun, nia hatutan, PN hosi lejislatura anteriór iha eis Prezidente Parlamentu Nasionál (PPN), Aniceto Longuinhos Guterres Lopes, nia tempu hanoin se mai nafatin ho natureza hanesan ne’e vale ou não vale bele mantein hela KKFP.
“Tanba relatóriu ka saida mak sira halo hanesan ho komisaun C (trata asuntu Finansa Públika PN), entaun tetu took sira mós atribuisaun osan ba sira kuaze atu boot liu tiha fali komisaun sira. Entaun, se sira-nia serbisu prodús relatóriu tinan ida dala ida ho orsamentu boot maibé não vale a pena,” nia dehan.
Tanba ne’e, nia dehan, hanoin hela PN sei ko’alia ho sira depois atu distingi tiha sira ka halakon tiha, maibé tenke liuhosi lei nune’e PN tenke aprova tiha lei mak halakon, tanba iha pensamentu sei halakon maibé sei halo konsulta ho sira.
Tanba, iha lei atuál ne’e loloos iha KKFP ne’e hakarak titulár sira hanesan eis Prezidente Repúblika, eis Primeiru-Ministru no eis Prezidente Parlamentu Nasionál, nune’e sira mai iha tiha osan eis titulár ninian ne’ebé sira la presiza saláriu maibé ida agora presiza saláriu no subsídiu boot.
“Ne’ebé, ita ho situasaun orsamentu Estadu ne’ebé defísil uitoan fundu petrolíferu, nune’e agora GOPAC (iha PN) komesa laiha no Grupu Mulher Parlamentár no KKFP rasik tinan ne’e atu halakon tiha de’it ka halo integra de’it iha PN, labele sai grupu ketak ida,” nia hateten.
Nune’e, KKFP nia funsionáriu ne’ebé iha sei intrega hotu ba sekretariadu PN, labele iha fali grupu ketak entaun tenke hasai osan sai hosi Parlamentu Nasionál (PN).
Notísia Relevante: Sustentabilidade fundu petrolíferu, KKFP sujere Governu hahú respeita regra RSE
Jornalista : Nelson de Sousa
Editór : Cancio Ximenes
