TURUSCAI, 12 janeiru 2024 (TATOLI) – Diretor Servisu Saúde Munisípiu Manufahi, Vitor Martins, dehan Saúde Munusipál, iha tinan-ne’e, sei halo reabilitasaun totál ba Postu Saúde Fahinehan tanba kondiasaun grave no fó ameasa tebes ba profisionál saúde sira ne’ebé hala’o servisu hodi atende pasiente sira
“Tinan ida-ne’e, ita sei halo reabilitasaun totál ba Postu Saúde Fahinehan ne’ebé nia kondisaun grave tebes tanba uma ne’e harii kleur ona, nia kakuluk sira mós aat ona, nia didin sira mós tuan ona, ita presiza halo reabilitasaun hotu kedan”, Diretór ne’e hateten ba Agência TATOLI iha Turiskai, ohin.
Nia dehan, Postu Saúde We’e Berek, Ailora iha parte Alas nian, Postu Saúde Foho Lau iha Postu administrativu Turiskai, Postu Saúde Bubulau iha parte Tutuluru no Postu Saúde Rotutu sei halo mós reabilitasaun maibé sei iha prosesu.
Aleinde ne’e, iha dezembru tinan kotuk funsionáriu kontratadu ne’ebé servisu iha Saúde Manufahi termina ona kontratu no responsavel másimu foti ona desizaun hodi halo jestaun ba rekursu umanu.
“Ha’u diretór foun foin mak simu posse horseik, maibé ita rekoñese funsionáriu kontratadu hamutuk 56 mak para ona sira-nia kontratu maibé iha diretora sesante, nia halo ona planu estratéjiku ne’ebé di’ak hodi halo jestaun ba rekursu, hanesan sentru saúde no postu saúde ne’ebé mak médiku, enfermeiru no parteira barak uitoan ita koloka fali na’in ida ou rua atu nune’e bele hala’o nafatin servisu hodi fó atendimentu ba ita-nia populasaun sira, ha’u mai kontinua de’it hodi hein Ministériu Saúde rekruta funsionáriu foun mai”, nia hatete.
“Ita tenke halo duni jestaun hanesan ne’e atu fó atendimentu di’ak ba ita-nia komunidade sira, bainhira Ministériu Saúde halo ona rekrutamentu ita foin bele koloka ba fatin ne’ebé menus médiku”, nia relata.
Kona-ba aimoruk, diretór haktuir, iha 2023 la iha problema medikamentu, maibé iha 2024 foin semana ida ba kotuk mak menus hanesan, kotrin iha item zero, parsetamol tablet iha hela, sirup mak item zero, multi-vitamina item zero no amoxelin mak item zero.
Iha Manufahi totál Postu Saúde hamutuk 23 no Sentru Saúde hamutuk haat no forsa servisu iha Saúde Munisípiu Manufahi hamutuk 200-resin inklui hosi kontratadu no voluntáriu.
Pesoal profisionál saúde kompostu hosi médiku iha 32, enfermeru iha 28 no parteira iha 26 ne’ebé permanente.
Jornalista: Hortencio Sanchez
Editór : Zezito Silva
