MANUFAHI, 14 janeiru 2024 (TATOLI)—Governu husu Sosiedade Sivil relata povu nia preokupasaun hodi halo peskiza ne’ebé kle’an no aprezenta ho dadus, nune’e Governu bele tau iha konsiderasaun.
“Sosiedade Sivil se bele imi sai nu’udar parseria nune’e haree situasaun saida de’it mai ho faktus kona-ba povu nia problema ami sei hola medida,” Vise Ministru Komersiu Industria, AgOstU Junuior Trindade, ne’ebé reprejenta Vise Primeiru-Ministru Mariano Assanami Sabino hato’o iha iha diálogu nasionál entre autoridade lokál, komunidade, membru Governu, Veteranu, Sosiedade Sivíl no entidade hotu iha postu administrativu Turiscai, munisipiu Manufahi, sábadu (13 janeiru 2023) ne’e.
Sosiedade Sivíl no komunidade tenke halo parseria, no liuhosi diálogu ne’e iha preokupasaun balun Governu hatan ona no problema balun Governu rezista hela hodi hato’o ba Ministeriu ida-idak nune’e bele halo diskusaun iha Konsellu Ministru.
Alende ne’e, iha fulan-marsu tina ne’e, Primeiru-Ministru Kay Rala Xanana Gusmão sei vizita munisipiu ida-idak hodi haree osan ne’ebé aloka ba kada ministeriu ho planu hirak ne’e konsege halo ka lae.
“Ita-nia Primeiru-Ministru sei la’o haleu munisipiu hodi haree situasaun iha munisipiu hotu tanba orsamentu aloka ona ba ministeriu ida-idak sé mak la halo servisu sei hasai tau ema seluk.
Preokupasaun ne’ebé parte hotu hato’o iha diálogu ne’e, importante tebes hodi fanu Governu atu halo servisu ho másimu liután.
Diretór Ezekutivu FONGTIL, Valentim da Costa Pinto, hato’o agradesimentu ba Governu ne’ebé lidera hosi Primeiru-Ministru, Kay Rala Xanana Gusmão, ne’ebé hakarak parseria ho Sosiedade Sivil hotu hodi hateke ba Timor-Leste nia futuru.
“Ami agradese tebes ba Governu ida-ne’e, tanba haforsa politika parseiru ho Sosiedade Sivil, ambiente ida-ne’e hatudu katak ita mantein servisu hamutuk maske iha naksalak ruma iha ita-nia servisu kada loron maibé hatudu nafatin ita-nia hamutuk,” nia hateten.
Reperezentante Prezidente Autoriade Munisipiu (PAM) Manufahi, Aleixo de Deus, ne’ebé partisipa mós iha diálogu ne’e husu ba Ministeriu Edukasaun atu labele haluha moto ne’ebé fó sai ona “Lori Edukasaun ba Povu”.
“Iha diálogu ne’e, ha’u hakarak husu ba reprezentante Edukasaun nian iha ne’e karik rona no anota. Sei hanoin ita-nia mote ka lae dehan ‘hakbesik edukasaun ba komunidade” tanba saida mak fasilidade edukasaun iha baze sei menus, funsionariu sei menus, oinsá ita atu atinje ita-nia mehi, reprezentante sira, ba hato’o hela ba Ministra Edukasaun,” nia hateten.
Reprezentante komunidade Manufahi, Natercia da Costa, sente kontente no agradese ba FONGTIL ne’ebé iha inisiativa di’ak realiza diálogu ne’e.
“Ami bele hato’o ami-nia preokupasaun fiar katak Governu halo anotasaun ne’e labele monu de’it iha dalan klaran, maibé lori netik to’o Dili hodi halo diskusaun nune’e bele rezolve ami-nia preokupasaun sira,” nia dehan.
Nune’e, nia hato’o agradesimentu ba Governante hanesan reprezentante kada ministeriu ne’ebé partisipa iha diálogu ne’e hodi ko’alia direta no rona direta preokupasaun povu nian, atu nune’e ba oin bele buka solusaun.
Diálogu ne’e, hanesan diálogu ne’ebé FONGTIL ho nia membru sira halo ba dala tolu ne’ebé hahú kedan iha tinan rua ba kotuk no sei kontinua kada tinan ba oin iha rejiaun sira-ne’ebé izoladu no istóriku.
Diálogu ne’e realiza tanba hetan apoiu másimu hosi Servisu Apoiu Servisu Sosiedade Sivil no Auditoria Sosiál (SASCAS, sigla portugés), Cruz Vermella Timor-Leste (CVTL, sigla portugés), Klinika Bairru Pite no seluk tan.
Atividade ne’e realiza iha Pouzada Turiscai ne’ebé partisipa másimu hosi autoridade munisipál, autoridade lokál no povu suku 11 iha postu administrativu Turiscai, munisípiu Manufahi.
Jornalista : Hortencio Sanchez
Editór : Cancio Ximenes
