iklan

EDUKASAUN, HEADLINE, MANUFAHI, MUNISÍPIU, POLÍTIKA, SAÚDE, SOSIEDADE SIVĺL

Lian hosi Xefe Suku 11 iha Turiscai ba Governasaun Xanana

Lian hosi Xefe Suku 11 iha Turiscai ba Governasaun Xanana

Xefe Suku na'in-11 iha Turiscai dada-lia ho Vise Ministru Asuntu Parlamentár, Aderito Hugo da Costa, iha ámbitu iha Dialógu Nasionál ne'ebé realiza iha Turiscai. Imajen Tatoli/Hortêncio Sanchez

TURISCAI, 14 janeiru 2024 (TATOLI) ‘’Ami-nia estrada, edukasaun, saúde, infraestrutura, agrikultura, eletrisidade, turizmu no seluk tan sai problema, maske ita ukun aan ona dékade rua ho balun, ami-nia problema ne’e komplexu tebes, ami husu Governu atu rezolve’’

Lia-hirak ne’e tún hosi xefe suku sira bainhira Sosieade Sivíl sira efetua diálogu aberta ho autoridade lokál, komunidade no Governu iha Postu Administrativu Turiscai, Munisípiu Manufahi.

Tuir mai akompaña vox pop hosi xefe suku na’in-11 iha Postu Administrativu Turiscai:

“Ami-nia preokupasaun mak estrada tanba ami Turiscai ne’e, estrada mak sai problema ba ami, husu ba Governu ida agora ne’e tenke tau importánsia sériu, kona-ba Planu Dezenvolvimentu Suku (PNDS) tenke kontinua nafatin tanba ida-ne’e fó duni benefísiu ba povu no povu sente ona”.

Xefe Suku Kaimauk Manuel Mendonça

“Preokupasaun ne’ebé povu nian iha ha’u-nia suku mosu oioin de’it, husu ba Governu da-sia ida-ne’e tenke tau atensaun liuliu ba setór edukasaun, saúde, infrastrutura no agrikultura, ho nune’e ukun ida agora tenke halakon tiha sistema partidaruzmu, tenke tau prioridade ba ema sira ne’ebé iha ona esperiénsia hanesan médiku sira, profesór sira, labele naran ba hasai sira, kontinua nafatin sira, haree hapara mak funsionáriu sira ho idade 60 ona ne’e la’os funsionáriu foinsa’e sira”.

Xefe Suku Matorek Lucas Vieira Branco

“Ami-nia Suku problema boot mak estrada ho agrikultura, aproveita membru Governu sira mai ona iha ne’e, ami hakarak hato’o kedan, estrada tenke hadia nune’e, ami bele iha vontade oinsa atu halo tos no natar, tanba iha ami-nia fatin iha mós natar, imi presiza ajuda mós ami fó netik tratór balu mai ami nune’e komunidade sira hodi fila rai, maibé estrada mak sai prioridade Governu tenke tau atensaun”.

“Kona-ba edukasaun, ami suku ida ne’ebé dook tebes hosi Turiscai Vila, iha ne’ebá eskola bainhira labarik sira tama ona ba ensinu báziku tenke mai eskola fali iha Turiscai ida-ne’e risku boot los tanba ami-nia oan sira mai hakur mota tolu, tempu udan fó ameasa ba ami-nia oan sira, nune’e Governu tenke buka alternativu, halo netik ponte balun, nune’e tempu udan ami-nia oan sira bele la’o ba eskola ho di’ak no ba komunidade sira hotu bele ultrapasa ba mai hodi lori produtu lokál sira mai faan”.

Xefe Suku Fatucalo Pedro de Oliveira

“Problema ne’ebé ha’u-nia suku hasoru mak eletrisidade tanba ami iha aldeia haat, aldeia rua asesu ona ba eletrisidade maibé aldeia rua seidauk asesu ba eletrisidade, Aldeia rua ne’e mak Asumata no Pereru, sé bele Governu ida-ne’e tau mós atensaun mai, ami iha problema kona-ba bee-moos, suku tomak seidauk asesu hotu, ami husu ba nai-ulun sira atu tau mós atensaun mai, atu nune’e ita-nia povu sira bele sente lolos ukun-aan ida-ne’e, ita labele husik ita-nia povu sira halerik bebeik”.

Xefe Suku Manu-Mera Abel da Costa

“Ami hato’o hela ba Ministériu Obras Públiku (MOP), estrada ligasaun hosi Turiscai ba Mindelu grave los, hahú Governu dala hira ona ami hato’o ami-nia proposta ne’ebé asina hosi Administradór Postu Administrativu maibé la iha resposta to’o ohin loron, iha Governu da-sia ne’e ami tenta nafatin maibé la iha nafatin resposta, maibé dalan ba Mindelu ne’e ba fatin Prezidente Nicilau Lobato nia mate fatin nusa mak sai tiha nune’e”.

“Husu nafatin ba Ministériu Obras Púbkika sé bele harii uma di’ak ruma iha ne’ebá atu nune’e ita nia maluk sira mai vizita Prezidente Nicolau Lobato nia mate fatin karik bele deskansa selu hatama osan ba Estadu, Ministériu Turizmu presiza servisu hamutuk ho Ministériu Obras Públiku atu transforma sai hanesan turizmu istóriku”.

Xefe Suku Mindelu Marcelo Barreto

“Problema boot iha ha’u nia suku mak bee-moos, suku tomak to’o agora seidauk asesu, komunidade sira la’o distánsia dook mak ba kuru bee-moos, oinsa Governu ida-ne’e atu haree hodi rezolve, ko’alia netik ho parseiru internasionál sira balun hodi ajuda netik ami ba, ami terus tinan naruk ona”.

Xefe Suku Lesuata Nazario de Oliveira

“Iha ha’u-nia suku problema boot mak rede telekomunikasaun, atu Telemor, Timor Telekom no Telkomcel susar hotu, sé bele husu ba Ministériu Transporte no Komunikasaun (MTK) ko’alia ho Telemor, Timor Telekom no Telkomcel atu harii tore iha ami-nia suku atu nune’e ami bele asesu ba liña komunikasaun nian, la iha rede komunikasaun ami iha suku ne’e labele asesu ba informasaun”.

Xefe Suku Foholau Manuel da Costa

“Ha’u mós ko’alia kona-ba estrada, Ministériu Obras Públiku bele tau atensaun mai ami ka lae, hadia netik ami-nia dalan ba, tanba ami atu lori ami-nia produtu lokál ba merkadu mós labele, la presiza tau alkatraun maibé halo kaber netik ba, halo netik valeta atu bee halai iha ninin, labele sobu estrada, maibé ami fiar nafatin ba Governu ida-ne’e sei realiza”.

Xefe Suku Orana Domingos de Jesus Nunes

“Ha’u ko’alia ba realidade ne’ebé ha’u-nia suku hasoru, liuliu ba infrastrutura sai difikuldade tebes mai ami, dalaruma ami-nia inan aman sira ko’alia katak seidauk sente ukun-aan ida ne’e ho lolos, iha área saúde nian mós sai difikuldade boot mai ami, ita-nia inan feton sira atu partus la iha ambulánsia, ami tula de’it ho kareta privadu maibé balun mai partus de’it iha dalan, balu la to’o tan iha Sentru Saúde Turiscai mate tiha iha dalan klaran, ida-ne’e ami sente la di’ak”.

Xefe Suku Liurai Miguel Pereira

“Iha ha’u-nia suku mota rua Namai ho Laklo fó ameasa tebes ba ha’u-nia komunidade sira-nia viajen, Ministériu Obras Públiku sé bele halo netik ponte ba, tanba tempu udan ha’u nia komunidade sira labele halo viajen, liuliu estudante sira. Ha’u-nia suku fatin istóriku mós tanba ita-nia Aman Taur Matan Ruak nia subar fatin iha ne’ebá, maibé suku ne’e nunka hetan atensaun hosi Governu”.

Xefe Suku Aitemua Abríl Martins

“Ha’u la koalia barak tanba kolega xefe suku sira ko’alia hotu ona, atu reforsa de’it kona-ba estrada ida-ne’e, mai ami Turiscai hanesan problema sériu, hahú hosi Urahou tama mai to’o Turiscai-Vila ho kondisaun grave, liga fali ba suku sira piór liu, ne’ebé ami husu ba Governu atu tau mós prioridade”.

Resposta Governu ba preokupasaun xefe suku sira iha diálogu nasionál ne’e

“Ha’u tenta atu hatan ba preokupasaun nai xefe suku na’in-11 nian, maibé xefe suku balu mak halo intervensaun ne’ebé ho nervu liu, xefe ita tenke altera uitoan saida mak ita ko’alia, dehan fali durante tinan 20-resin povu iha Turiscai ne’e la sente ukun-aan ne’e hanoin lalos, ita ignora realidade”, Vise Ministru Asuntu Parlamentár Adérito Hugo da Costa hatan.

Nia husu ba xefe suku no povu hotu atu valoriza ukun-aan ne’ebé restaura ona iha tinan 2002.

“Governu prepara ona programa ida oinsa ba oin xefe suku sira atu halo saida, kompeténsia saida mak Governu sentrál fó liuhosi dekretu lei lubuk ida, kondisaun xefe suku sira-nian ne’ebé mínimu ne’e ami eleva, eleva ho númeru aumenta ofisiál suku durante ne’e ida de’it agora aumenta tan tolu hamutuk na’in haat sei halo servisu iha baze, liña ministeriál sira sei destaka nia ema mai to’o iha suku atu haree oinsa halo dezenvolvimentu ba suku”, nia friza.

Nia hatutan, Governu muda ona munisípiu hotu sai Autoridade Munisipál atu ba oin implementa poder lokál nune’e hakbesik liu dezenvolvimentu iha baze, hodi realiza preokupasaun ne’ebé xefe suku sira hato’o.

Aleinde ne’e, nia husu ba xefe suku no komunidade Turiscai hotu atu labele laran susar tanba Governu da-sia tau ona prioridade atu hadia estrada hosi Urahou Maubisse tama to’o Postu Administrativu Turiscai.

“Dalan Urahou mai Turiscai husu ba inan no aman sira, imi lalika hanoin barak buat hotu feitu ona, hein tempu besik ita hadia, depois mak ita haree fali balu ba suku ne’e”, nia adianta.

Kona-ba preokupasaun seluk hanesan, agrikultura, saúde, edukasaun no seluk tan mak membru Governu ne’e anota sei aprezenta ba Konsellu Ministru hodi halo diskusaun.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!