DILI, 14 janeiru 2024 (TATOLI) – Santal Tacconi hanesan membru Korpu ba Pás hosi Estadus Unidus America (EUA) orgullu sai voluntáriu iha Timor-Leste.
“Ha’u orgullu no kontente tebes sai voluntáriu iha Timor-Leste, ha’u aprende buat barak hosi kultura Timor nian hanesan valór fraternidade no solidaridade”, Santal dehan ba Agência TATOLI iha Turiscai, ohin.
Nia dehan, misaun Korpu ba Pás iha objetivu tolu mak atu ajuda ema sira kbiit laek ne’ebé presiza tulun, ema Amerika sira tenke sai ba nasaun liur hodi aprende kultura no atu hametin relasaun no kooperasaun entre nasaun ne’ebé de’it ho EUA.
“Ami mai iha Timor-Leste ho esperansa atu aprende ho timoroan sira fahe mós ami-nia koñesimentu no abilidade liuliu atu servisu hamutuk hodi promove kolaborasaun iha nivel komunidade, ami-nia kna’ar mai iha ne’e, la’os atu hanorin maibé atu servisu voluntáriu de’it iha área saida de’it hodi tulun timoroan”, nia relata.
Santal, daudaun ne’e, hela iha Munisípiu Manufahi ne’ebé servisu iha Organizasaun Naun Governamentál (ONG) rua hanesan Luta ba Futuru no CEFOBOM.
“Korpu ba Pás nia misaun importante ida mós aprende kona-ba kultura, presiza integra iha komunidade, maibé iha Timor-Leste ha’u haree katak valór komunidade mak importante liu, entaun ami koko hela hanesan timoron, tein hahan hanesan timoroan, dansa hanesan timoroan, kanta hanesan timoroan”, nia hatete.
Santal ho nia grupu voluntáriu estadia iha Timor-Leste iha 10 outubru tinan kotuk hamutuk ema na’in 14 ne’ebé dadaun ne’e sirkula iha territóriu nasionál hodi servisu hamutuk ho timoroan sira iha área saida de’it.
Bainhira to’o iha Timor-Leste, Santal ho nia grupu dezloka kedan ba Gleno, Munisípiu Ermera hodi tuir formasaun lian tetun durante semana 10.
Santal ho nia grupu hala’o misaun voluntáriu iha Timor-Leste durante tinan rua, hahú dezembru 2023 to’o dezembru 2025.
“Ami-nia misaun tinan rua de’it, bainhira tempu to’o, ami sei fila fali ba Amerika”, nia salienta.
Korpu ba Pás nu’udar servisu rede voluntáriu internasionál ida, membru komunidade, nasaun país uma-na’in parseiru sira no membru ekipa sira hala’o servisu tuir ajénsia nia misaun ba amizade no dame mundiál.
Bazeia ba konvite husi Governu sira iha mundu tomak, voluntáriu Korpu ba Pás servisu hamutuk ho membru komunidade sira lokalmente hala’o projetu ne’ebé prioritiza ba iha edukasaun, saúde, ambiente, agrikultura, dezenvolvimentu ekonómiku komunitária no dezenvolvimentu juventude.
Liuhosi serbisu hirak ne’e, membru Korpu ba Pás nia rede dezenvolve no transfere abilidade no hametin kompeténsia interkulturál ne’ebé mak tau sira-nia pozisaun nu’udar jerasaun tuir mai ba lidér globál.
Dezde Prezidente John F. Kennedy estabelese Korpu ba Pás iha tinan 1961, Amerikanu hamutuk 240,000 resin mak serví ona iha nasaun 142 iha mundu.
Jornalista: Hortencio Sanchez
Editór : Zezito Silva
