MANUFAHI, 14 janeiru 2024 (TATOLI)—Koordenadór Gabinete Servisu Apoiu Sosieade Sivil no Auditoria Sosial (SASCAS, sigla portugés), Joaquim da Costa Freitas, enkoraja Sosiedade Sivil hotu sai nu’udar ponte hodi liga povu nia preokupasaun ba Governu.
“Sosiedade Sivil sai hanesan ponte hodi liga preokupasaun povu nian ba Governu. Labele Sosiedade Sivil subar fali iha organizasaun hurlele ami iha Governu tasak didi’ak, tenke parseria ho Governu hodi haree ba preokupasaun povu nian,” Joaquim da Costa Freitas hateten iha iha diálogu nasionál entre autoridade lokál, komunidade, membru Governu, Veteranu, Sosiedade Sivíl no entidade hotu iha postu administrativu Turiscai, munisipiu Manufahi, sábadu (13 janeiru 2023) ne’e.
Nune’e, nia husu lideransa organuzasaun Naun Governamentál (ONG) hotu atu impoin boa-Governasaun no la’ós helik iha ONG kritika de’it Governu maibé la aplika boa-Governasaun iha organizasaun laran.
Aleinde ne’e, Sosiedade Sivil ne’ebé hetan fundu iha tinan 2023 tenke hatama relatóriu iha fulan-marsu no bainhira la kumpre tempu ne’ebé termina mak sei la asina tan memorandu intendimentu ba oin.
SASACAS sei reforsa parseiru forte ho organizasaun Sosiedade Sivil sira hotu atu hakat ba oin hodi halo servisu másimu liután ho kualidade.
“Segunda ba oin manuál ba jestaun fundu Sosieade Sivil prontu ona no hetan aprovasaun hosi Vise Primeiru-Ministru Asuntu Sosiál, entaun Sosieade Sivil hotu segunda ba iha SASCAS atu foti nanuál ne’e atu dezenvolve proposta tuir manuál ne’ebé mak iha. Ita sei la tolera malu tan iha projetu sira-ne’ebé Sosiedade Sivil asume nia responsabilidade tanba iha tinan 15 bainhira Gabinete ne’e estabelese ita tolera malu lubuk ida, maibé ba oin laiha ona toleránsia tenke hatudu rezultadu ho kualidade,” nia hateten.
Diretor Ezekutivu FONGTIL, Valentim da Costa Pinto, hateten relatóriu ne’ebé SASCAS husu loos tanba fulan-marsu kontratu apoiu hosi SASCAS ba Sosiedade Sivil sira termina tenke hatama duni relatóriu.
“Ida-ne’e la’ós ameasa mai ami maibé organizasaun sira-ne’ebé sai benefisiáriu ba fundu hosi SASCAS tenke submete relatóriu final, relatóriu narativu no relatóriu finansa tenke halo submisaun,” nia hateten.
Nia dehan, relatoriu hamutuk rua hanesan ativiade no finanseiru no atividade nian saida mak halo ona esplika nia lala’ok sira, atividade sira prienxe objetivu ka la’e, no ikus mak relatóriu finansa kona-ba osan ne’ebé simu gasta oinsá, tenke halo relatóriu ketak ida hodi aneksa iha relatóriu narativu hodi justifika kona-ba prosesu ezekusaun.
Nia dehan, FONGTIL bainhira submete relatóriu la’ós de’it atividade maibé submete mós relatóriu audit extarnál ne’ebé hosi parte seluk mak halo audit, ho nune’e FONGTIL sei submete relatóriu hamutuk tolu ba SASCAS.
Iha tinan 2023, FONGTIL hetan apoiu fundu hosi SASCAS hamutuk rihun $250 ne’ebé apoiu ona ba atividade sira hanesan auditória sosiál, realiza diálogu nasionál ne’ebé foin ramata no apoiu mós ba enkontru anúal kada membru iha teritóriu nasionál.
Membru Sosiedade Sivil ne’ebé sai membru ba FONGTIL hamutuk 270 ne’ebé eziste iha munisipiu 13 inklui RAEOA.
Iha tinan 2023 SASCAS apoiu fundu ba Sosiedade Sivil sira iha Timor-Leste hamutuk $1.700.
Jornalista : Hortencio Sanchez
Editór : Cancio Ximenes
