iklan

HEADLINE, MANUFAHI, MUNISÍPIU, POLÍTIKA, SEGURANSA

Xefe Suku Caemauc husu Governu trata kondisaun dignu ba membru OPS

Xefe Suku Caemauc husu Governu trata kondisaun dignu ba membru OPS

Komunidade sira ne'ebé partisipa iha Dialógu Nasionál ne'ebé realiza iha Turiscai. Imajen Tatoli/Hortêncio Sanchez

TURISCAI, 14 janeiru 2024 (TATOLI) – Xefe Suku Caemauc, Postu Administrativu Turiscai, Munisípiu Manufahi, Manuel Mendonça, husu ba Governu atu trata kondisaun ne’ebé dignu ba membru Ofisiál Polisiamentu Suku (OPS).

“Ita bele ko’alia atu halo saida de’it maibé seguransa ne’e mak importante liu, oinsa mak Governu nunka tau importánsia ba OPS sira, husu ba Governu ida-ne’e katak sé bele harii uma kada suku ba sira atu hela, fó motorizada ne’ebé di’ak ba sira, tanba distansia suku ne’ebé dook halo sira susar halo atuasaun ba problema sira akontese iha suku laran”, Manuel dehan iha diálogu nasionál ne’ebé realiza hosi Sosiedade Sivil iha Turiscai, ohin.

Nia husu ba Ministériu Interiór (MI) atu aumenta tan númeru PNTL iha munisípiu no postu administrativu sira tanba membru Polísia Nasionál Timor-Leste (PNTL) sei menus liu.

“Ministériu Interiór, sé bele aumenta tan númeru PNTL nian ba, tanba iha postu sira-ne’e membru PNTL lá to’o na’in 10, ida-ne’e sira atu halo servisu oinsa, sira atu atende problema oinsa, maibé ami agradese ba membru PNTL hotu iha Turiscai liuliu OPS sira, maske udan rai dodok ho kondisaun ládun di’ak, problema ruma ami kontaktu sira sempre to’o hodi halo atuasaun”, Xefe Suku refere.

Hatan ba preokupasaun ne’e, Vise Ministru Komérsiu Indústria Augosto Junior Trindade ne’ebé reprejenta Vise Primeiru Ministru Mariano Assanami Sabino dehan, Governu halo anotasaun ba preokupasaun ne’e tanba importante duni.

“Ba preokupasaun kona-ba kondisaun OPS nian ne’e ami anota hodi ba hato’o ba Ministru Interiór no ami sei halo diskusaun iha Konsellu Ministru depois mak fó rezultadu”, nia konklui.

Jornalista: Hortencio Sanchez

Editór : Zezito Silva

iklan
iklan

Leave a Reply

iklan
error: Content is protected !!