DILI, 15 janeiru 2023 (TATOLI) – Movimentu Amante futeból, José Luís Oliveira, lamenta tebes ho Federasaun Futeból Timor-Leste (FFTL) ne’ebé kansela kongresu estraodináriu hodi la hili prezidente foun tanba fó impkatu ba dezenvolvimentu futeból iha Timor-Leste.
“Primeiru triste tebes ba akontesementu ka kanselamentu kongresu ne’e mai hosi Federasaun Futeból Timor-Leste hodi la konsege hili-nia prezidente foun. Triste tanba sa, tanba ema sira ne’ebé hakarak mete iha desportu, maibé laiha mentalidade laiha espíritu desportivu”, hateten nia ba Agência TATOLI iha kna’ar fatin-Dili.
Kanselamentu akontese, nia dehan tanba kongresu ne’e asosiasaun tolu hanesan Ainaro, Viqueuque no arbitrajen laiha ona direitu ba votu, tanba hetan ona osan, ida ne’e presiza iha asembleia ida hodi nomeia ema ida, maibé sira obriga aan hodi ba.
“Buat ida lamentável tebes mak kongresu ne’e iha reprezentasaun Asian Football Federetion no Federation International Football Asosiation nia oin, sira mós prátika buat ida mafiozu iha laran. Molok han meudia deside buat ida no depois de han meudia foti fali desizaun seluk mak mai nune’e mosu kanselamentu ne’e”, nia preokupa.
Alende ne’e, nia afirma tuir rejimentu FFTL katak ema ne’ebé tama lista kanddidatu ba prezidente tenke marka prezensa iha kongresu.
“Se tama iha lista kandidatura ba FFTL, tenke marka prezensa hodi bele aprezenta nia programa prioridade no koa’lia ho kongresista sira. Maibé kandidatu Francisco Kalbuady Lai, la marka prezensa, ne’e loloos automatikamente tama iha lista esluidu”, nia afirma.
Ho kanselamentu ne’e, nia dehan bele ameasa ba mundu desportivu ka dezenvolvimentu futeból iha Timor-Leste tanba laiha ema ida atu dirije.
“Laiha prezidente FFTL, oinsa mak atu konduz prosesu dezenvolvimentu futeból. Tenke iha prezidente duni, maibé agora prezidente ida ne’ebé mak ita hakarak, prezidente ida ne’ebé iha vizaun di’ak no iha programa di’ak no ema tenke iha mentalidade ida justu no onestu,” katak nia.
Relembra, kongresu estraordináriu F-FTL ne’e realiza iha loron 10 janeiru 2024, iha otél Timor, ne’ebé asosiasaun 7 mak partisipa no hetan observasaun direita hosi AFC no FIFA, maibé hetan dezentendimentu no konsege kansela hodi la hili estrutura foun.
Jornalista: Jesuína Xavier
Editór : Florencio Miranda Ximenes
