Deputada CNRT preokupa eletrisidade mate-lakan afeta serbisu iha aeroportu

DILI, 15 janeiru 2024 (TATOLI)—Deputada bankada CNRT iha Parlamentu Nasionál (PN), Carminda Carlota, preokupa bainhira eletrisidade mate-lakan afeta ba serbisu iha aeroportu internasionál Nicolau Lobato, Comoro.
“Ha’u atu ko’alia uitaon eletrisidade iha aeroportu iha semana kotuk, iha pasajeiru barak mai iha rai-laran tama mai iha laran eletrisidade mate. Entaun, afeta tebes ba ita-nia mákina X-Ray para labele leno pasta sira-ne’e. Ida-ne’e afeta mós serbisu imigrasaun atu haree pasajeiru sira-nia pasaporte,” Deputada bankada Governu ne’e levanta liuhosi reuniaun plenária PN, segunda ne’e.
Tanba ne’e, nia sujere ba minstériu kompetente hodi tau mákina jeradór boot ruma iha ne’eba, nune’e eletrisidade mate bele substitui hodi la afeta ba serbisu no pasajeiru sira iha aeroportu bainhira hala’o vou tama mai rai-laran.
Iha reuniaun plenária, Deputadu CNRT, Saul Salvadór mós, foti eletrisidade ne’ebé observa tinan barak nia laran área ne’e seidauk konsege jere ho didi’ak kona-ba reseita iha VIII Governu Konstitusionál, maske área eletrisidade muda ona ba empreza públika.
Bazeia ba dadus iha kuaze 90% eletrifikasaun territóriu laran ahí lakan ona so falta de’it 3%, kada tinan Governu aloka orsamentu boot atu responde ba populasaun hotu hodi bele asesu enerjia, maibé sei iha problema atu rekolla reseita hosi eletrisidade rasik tanba menus liu, nune’e husu IX Governu atu haree didiak kestaun ne’e.
“Primeiru kestaun kontrolu ladún efetivu ba uma-kain prepagu sira balun sei uza ilegál, balun tanba kontadór avaria, nune’e labele kontribui reseita. Solusaun ne’ebé rekomenda presiza rekruta tan funsonáriu kada postu, apoiu transporte sira,” nia dehan.
Iha reuniaun plenária ne’e, la marka prezensa husi parte Governu liuhusi Vise Ministru asuntu Parlamentár, Adérito Hugo da Costa, tanba ohin iha reuniaun Konsellu Ministru (KM) nune’e partisipa de’it tékniku sira hodi rejista preokupasaun Deputadu sira-nian.
Jornalista : Nelson de Sousa
Editór : Cancio Ximenes

