Top

Deputada PD preokupa komunidade Foholau-Aileu la asesu eletrisidade

Tékniku EDTL, E.P halo hela manutensaun liña eletrisidade iha Estrada-ibun Praia dos Coqueiros, Dili, kuarta (14/06/2023). Imajen Tatoli/Francisco Sony

DILI, 15 janeiru 2024 (TATOLI)—Deputada bankada Partidu Demokrátiku (PD), Rozena Fátima Martins, segunda ne’e, liuhosi reuniaun plenária iha Parlamentu Nasionál (PN) levanta preokupasaun komunidade hosi suku Foholau, munisipíu Aileu ne’ebé dezde Timor-Leste independénsia to’o agora seidauk asesu eletrisidade, nune’e husu IX Governu Konstitusionál atu tau atensaun.

“Problema eletrisidade iha munisípiu Aileu iha suku Foholau iha aldeia haat mak até a data eletrisidade seida’uk tama iha ne’eba, aldeia haat ne’e mak Mauluria, Saharai, Asimilati, Haturai ho totál nia populasaun 1990,” nia hateten iha sala plenária PN.

Aleinde ne’e, Deputada hosi bankada Governu ne’e mós foti preokupasaun estrada ligasaun hosi Maliana-Bobonaro ne’ebé to’o agora seidauk halo reabilitasaun, ne’ebé ho kondisaun aat tebes no husu ministériu relevante toma atensaun.

Iha reuniaun plenária, Deputada CNRT, Carminda Carlota ho Deputadu FRETILIN, José Virgílio, levanta preokupasaun liga ponte Nunura-Bobonaro ne’ebé ameasadu tebes iha tempu udan, nune’e husu Ministériu Obra Públika (MOP) atu tau atensaun.

Deputada FRETILIN, Lidia Norberta, foti kestaun relasiona ho mota balun iha parte Aileu nian iha rai ida Ermeti, iha baliza suku Baulero ho Fatukisi ne’e aat, nune’e presiza tau atensaun.

Iha reuniaun plenária ne’e, la marka prezensa hosi parte Governu liuhosi Vise Ministru asuntu Parlamentár, Adérito Hugo da Costa, tanba ohin iha reuniaun Konsellu Ministru (KM) nune’e partisipa de’it tékniku sira hodi rejista preokupasaun Deputadu sira nian.

Jornalista : Nelson de Sousa

Editór        : Cancio Ximenes  

Publisidade

Leave a Reply

Latest Post

error: Content is protected !!