VIQUEQUE, 15 janeiru 2024 (TATOLI)—Eskola Ensinu Báziku Filiál (EBF) Uaimori, postu Viqueque Vila, munisípiu Viqueque daudaun ne’e presiza profesór.
“Daudaun ne’e iha ami-nia eskola laiha profesór kontratadu, profesór na’in-rua mate ona no na’in-tolu agora moras grave. Nune’e, daudaun profesór hela ami na’in-ualu maka kontinua hanorin hosi klase 1 to’o klase 6. Ami presiza profesór na’in-haat hodi reforsa ami hanorin estudante sira tanba ami na’in-ualu difísil kontrola no lori matéria,” Koordenadór Eskola EBF Uaimori, postu Viqueque Vila, munisípiu Viqueque, António Ferreira Gonzaga, informa ba Agência Tatoli, iha ninia knaar fatin, segunda ne’e.
Profesór hirak ne’e lori matéria hanesan matemátika no relijiaun hosi klase 1 to’o 6.
“Profesór ne’ebé ami presiza liu maka matemátika tanba daudaun laiha, nune’ebé durante ne’e ha’u maka lori fali matéria ne’e, enkuantu ha’u-nia área espesialidade desportu, tanba de’it rekursu menus maka ha’u substitui hanorin matemátika. Nune’e, aban bainrua sei fó impaktu ba estudante terseiru siklu sira, ida-ne’e mak ami husu tenke tau profesór espesífiku ba matéria sira,” nia akresenta.
Notísia relevante : Profesór kontratadu na’in-13 deside kontinua hanorin iha ESG Dom Carlos Belo
Aleinde ne’e, presiza mós profesór saúde ijene, relijiaun no portugés hodi hanorin estudante tanba profesór hanorin lian portugés ho idade 65, nune’e presiza rekruta hodi hanorin sala aula hamutuk 10.
“Durante ne’e rekursu umanu profesór mínimu, entaun ami hanorin tuir ami-nia koñesimentu, atu hanorin tuir kurríkulu hosi edukasaun, ami la prienxe tanba profesór limitadu,” nia akresenta.
Nune’e nia husu Governu atu rekruta profesór hodi kompleta rekursu umanu tanba bainhira la rekruta profesór, presiza fó sai karta katak simu profesór voluntáriu sira tanba daudaun graduadu área edukasaun lisensitura barak maka la serbisu.
Eskola EBF Uaimori halo ona pedidu dala-rua ba Servisu Edukasaun Viqueque maibé seidauk iha resposta ruma hodi aumenta profesór.
Tuir dadus, estudante Eskola EBF Uaimori ba letivu 2023 hamutuk na’in-329, kompostu hosi klase 1 A no B na’in-55, klase 2 A no B na’in-69, klase 3 A no B na’in-58, klase 4 A na’in-47, klase 5 A no B na’in-59 no klase 3 A na’in-51.
Iha fatin seluk, Diretór Servisu Edukasaun munisípiu Viqueque, Domingos Brandão, rekoñese profesór hosi eskola ne’e limitadu. Profesór sira-ne’e maioria idade avansadu no presiza reforsa profesór, maibé desizaun atu aumenta iha Ministériu Edukasaun.
“Ha’u hatene profesór hanorin iha EBF Uaimori limitadu no kuaze ho idade avansadu, tanba ne’e ita presiza aumenta duni, maibé desizaun iha ministériu hanesan mós profesór kontratadu sira-ne’ebé agora kontratu hotu sira-ne’e,” nia tenik.
Tuir observasaun jornalista Agência Tatoli iha terrenu, nota katak iha segunda ne’e, tuku 08:00 dadersan to’o meudia estudante barak mak halimar de’it iha areadór eskola nian no balun tuur iha aula laran, laiha profesór hodi fó matéria ba estudante sira.
Jornalista : Vitorino Lopes da Costa
Editora : Julia Chatarina
