DILI, 15 janeiru 2024 (TATOLI)–Governu liuhosi reuniaun Konsellu Ministru estraordináriu, segunda ne’e, deside hodi ezonera Longuinhos Armando Leto hosi kargu Prezidente Konsellu Administrasaun Institutu Nasionál Seguransa Sosiál (INSS).
“Konsellu Ministru aprova projetu rezolusaun Governu, ne’ebé aprezenta hosi Vise-Ministra solidariedade Sosiál no Inkluzaun, Céu Brites, kona-ba ezonerasaun Longuinhos Armando Leto hosi kargu Prezidente Konsellu Administrasaun Institutu Nasionál Seguransa Sosiál no Prezidente Konsellu Fundu Rezerva Seguransa Sosiál,” refere nota ne’ebé Agência Tatoli asesu hafoin reuniaun ezekutivu, iha Palásiu Governu.
Notísia relevante : Governu renova mandatu membru Konsellu Administrasaun INSS
Iha sorin seluk, Prezidente INSS sesante, Longuinhos Armando, hateten, tuir loloos ninia mandatu sei ramata iha fulan-janeiru 2025.
“Ha’u simu knaar ne’e ba mandatu dala-rua ona, mandatu dahuluk iha tinan 2019, iha tinan 2022 mak renova, ne’ebé tuir loloos ha’u-nia mandatu ramata iha 2025, maibé tanba desizaun polítika entaun tenke ezenora ha’u. Ha’u simu desizaun ne’e no ha’u hein bainhira mak ministériu realiza serimónia hand over,” Longuinhos hato’o ba Agência Tatoli, via telefónika.
Nia dehan, maski daudaun la serbisu ona iha INSS maibé prontu koopera to’o Prezidente foun iha no entrega relatóriu durante mandatu.
“Ha’u funsionáriu públiku iha Ministériu Agrikultura, ne’ebé ha’u sei filafali bá serbisu iha ne’ebá,” nia akresenta.
Jornalista : Antónia Gusmão
Editora : Julia Chatarina
