Guarda Florestál na’in-12 serbisu voluntáriu iha Agrikultura Viqueque
VIQUEQUE, 15 janeiru 2024 (TATOLI)—Xefe Departamentu Reprezentante Territoriál Servisu Agrikultura munisípiu Viqueque, José da Silva, informa, daudaun Guarda Florestál na’in-12 halo serbisu voluntáriu apoia Servisu Agrikultura Viqueque.
“Bazeia ba karta sirkulár, katak loron 31 dezembru 2023 ami-nia Guarda Florestál na’in-12 ne’e kontratu hotu, atu kontinua ka la’e ha’u seidauk simu karta formál ruma. Nune’e, daudaun ne’e sira seidauk asina kontratu, maibé sira kontinua mai apoia ami tanba serbisu ida-ne’e Guarda Florestál presiza reforsa. Tanba ne’e, maka sira mai ho inisiativa,” José da Silva, hateten ba Agência Tatoli, iha ninia knaar fatin, Beloi, segunda ne’e.
Nia haktuir, serbisu Guarda Florestál durante ne’e apoia tebes halo kontrola rikusoin sira-ne’ebé iha munisípiu Viqueque, maibé daudaun Governu la kontinua sira-nia kontratu.
“Se maluk kontratadu sira-ne’ebé daudaun iha ne’e maka kontratu hotu, ema sei tesi ai ilegál barak tan. Sira ajuda redús ema tesi ai ilegál, maibé Governu la kontinua, ne’e depende ba desizasaun na’i-ulun sira-nian,” nia akresenta.
Notísia relevante : SEF hakarak buka dalan asegura kontratadu guarda florestál
Tanba ne’e, nia husu ba entidade responsável iha Governu hodi tetu kontratu sira, atu nune’e bele halo vijilánsia ba floresta iha munisípiu Viqueque no presiza aumenta hodi bele kontrola másimu área sira-ne’ebé ema tesi ai beibeik.
Tuir dadus, Guarda Florestál munisípiu Viqueque iha kontratadu hamutuk na’in-12 no permanete na’in-hitu, ne’ebé daudaun ne’e balun destaka ba postu lima tuir jeografia kada postu administrativu.
Iha fatin hanesan, Diretór Servisu Agrikultura munisípiu Viqueque, Joaquim Fernandes, dehan, bainhira pesoál hirak ne’e nia kontratu ramata maka sei fó impaktu ba floresta tanba durante ne’e sira mak fó apoia ba Servisu Agrikultura.
“Uluk ami iha planu atu aumeta Guarda Florestál no agora mós hanoin aumenta, maibé liuhosi karta sikulár katak sira-niaa kontratu hotu, entaun sei difikulta serbisu tanba munisípiu Viqueque área jeografia ne’e luan purvolta 1,877 km2, nune’e ema bele livre halo ativdade tesi ai ilegál tanba ita-nia ema limitadu. Ita hakarak miniza ema tesi ai ilegál, maibé hamenus rekursu,” nia tenik.
Área jeografia munisípiu Viqueque 1,877 km2 hosi postu adiministrativu lima ho totál suku 36, kompostu hosi Lacluta 416,54 km2, Uatukarbau 139,7 km2, Uatulari 294,13 km2, Ossu 427,17 km2 no postu Viqueque Vila 610,90 km2.
Jornalista : Vitorino Lopes da Costa
Editora : Julia Chatarina
