DILI, 15 janeiru 2024 (TATOLI)- Deputadu PLP, Helder Freitas Kamarudi, husu Governu liuliu Ministériu Edukasaun (ME) atu tau atensaun ba estudante sira-nia uniforme iha eskola públiku tanba, segunda (15 janeiru 2023) ohin, ensinu aprendizajen ano letivu foun hahú ona.
“Ha’u simu preokupasaun hosi estudante sira nia inan-aman kona-ba farda ka uniforme ba estudante sira, tanba ohin segunda-feira ensinu aprendizajen komesa ona,” nia hato’o liuhosi reuniaun plenaria PN, segunda ne’e.
Deputadu hosi bankada opozisaun ne’e mós preokupa ho profesór kontratadu ninia kontratu ramata laiha renovasaun bele prezudika prosesu aprendizajen, nune’e husu ministériu edukasaun toma atensaun.
Deputadu CNRT, Patrocinio Fernandes dos Reis, bolu atensaun ba ministériu atu iha mekanizmu kontrola ne’ebé di’ak ba eskola iha ámbitu ano letivu foun relativa ho eskola sira hala’o atividade orientasaun ba estudante foun sira, nune’e bele garante nafatin pás iha eskola sira no labele kria fali konflitu.
Tanba orientasaun ba estudante foun ne’e la’ós previstu iha kuííkulu, nune’e presiza kontrola ne’ebé di’ak hosi ministériu ba eskola sira nune’e orientasaun ne’ebé la’o iha eskola sira la’o di’ak.
Deputada CNRT, Aliança Conceição, mós bolu atensaun ba eskola sira atu iha orientasaun ba estudante foun iha ano letivu foun atu la’o ho hakmatek no orienta duni estudante sira ho di’ak.
Jornalista : Nelson de Sousa
Editór : Cancio Ximenes
