DILI, 15 janeiru 2024 (TATOLI) – Ministra Saúde, Elia dos Reis Amaral, deklara ba públiku katak informasaun ne’ebé mak espalla iha media sosiál katak bandu médiku sira labele pasa reseita ba pasiente sira-ne’e la los.
“Informasaun ne’ebé mak fo sai iha públiku relasiona ho aimoruk menus iha fasilidade saúde Minsitra Saúde bandu médiku sira labele pasa reseita ba pasiente sira ne’e la los, entaun ha’u husu tenke hatudu faktu tanba ha’u seidauk hasai liafuan sira ne’e, karik médiku sira mak hakarak iha situasuan balun atu ko’alia ne’e sira-nia direitu, maibé kazu sira-ne’e ha’u sei investiga sira”, Elia Amaral hatan ba jornalsita sira iha Palásiu Governu, ohin.
Antes ne’e, pasiente Aida da Costa Pinto, husu ba Ministériu Saúde atu rezolve lalais estoke ai-moruk iha fasilidade saúde sira ne’ebé mamuk hodi fó impaktu ba populasaun sira atu halo tratamentu saúde.
“Ha’u husu ba Ministériu Saúde atu aselera lalais aimoruk ne’ebé mak estoke la iha, atu nune’e labele fó impaktu ba ami-nia saúde”, Aida dehan.
Nia informa, bainhira aimoruk iha Hospitál Nasionál Guido Valadares (HNGV), la iha mak fó Impaktu ba iha pasiente sira, tanba médiku sira fó reseita atu ba hola iha farmasia privadu sira.
“Ha’u moras anemia, ne’ebé ha’u foin mai konsulta hotu tiha, doutór sira fó reseita ba iha farmasia HNGV nia atu foti aimoruk, maibé to’o iha farmasia enfermeiru sira dehan aimoruk la iha, nune’e ho kondisaun saúde atu di’ak ha’u ho konsiénsia foti reseita ba sosa ai-moruk iha klínika privada”, nia konklui.
Jornalista : Felicidade Ximenes
Editór : Zezito Silva
