iklan

NASIONÁL, DILI, HEADLINE, SOSIEDADE SIVĺL

RENETIL lamenta estoke ai-moruk mamuk no laiha pesoál saúde atende pasiente sira

RENETIL lamenta estoke ai-moruk mamuk no laiha pesoál saúde atende pasiente sira

Sekretáriu Jeral Renetil, Joaquim “Russuo” Fonseca.Imajen/espesiál

DILI, 15 janeiru 2024 (TATOLI)– Resistência Nacional dos Estudantes de Timor-Leste (RENETIL) lamenta tebes ho funsionamentu sistema saúde rai laran, tanba postu saúde iha munisípiu 12 taka relasiona ho menus profisionál saúde no estoke ai-moruk iha fasilidade saude sira laiha.

Ho situasaun ne’e, Sekretáriu Jeral RENETIL, Joaquim “Russuo” Fonseca, husu ba Governu foti asaun imediatu atu rekruta pesoál saúde kualifikadu hodi normaliza atendimentu iha postu saúde sira no halo akizisaun imediatu ba ai-moruk sira hodi bele fó atendimentu ba populasaun ne’ebé moras.

Notísia relevante:Bankada FRETILIN-KHUNTO kontinua ezije Governu solusiona problema aimoruk ‘stock out’

“Daudaun ne’e, sistema saúde iha Timor-Leste kuaze paralizadu, postu lubuk iha munisípiu 12 tenke taka, tamba pesoál saúde sira laiha. Sentru saúde no ospital referál sira laiha profisionál saúde natoon atu atende pasiente sira. Ai-moruk esensiál no bens konsumivél ´stock out” ka laiha estoke iha instalasaun saúde sira inklui HNGV ”, lamenta Sekretaáriu Jerál RENETIL liuhosi konferénsia imprensa iha sede Faról-Dili.

RENETIL mós husu MS reve distribuisaun tarefa entre Xefia Ministériu Saúde nian, no atribui kompeténsia loloos ba Vise-Ministru ne’ebé responsabiliza operasionalizasaun ospitál sira.

Husu mós ba Komisaun F husi Parlamentu Nasionál atu halo fiskalizasaun loloos hodi garante katak medida foun sira ne’ebé Governo sei hola hodi rezolve situasaun ne’e adekuadu duni.

Ba Provedór Direitu Umanu no Justisa, atu hala’o analiza didi’ak husi perspektiva direitu ekonomiku, sosiál no kultural, ho doutrina realizasaun progressiva, atu identifika fatór ne’ebé kontribui ba degradasaun iha realizasaun direitu ba saúde, no sevisu ho Governu atu fó solusaun ne’ebé adekuadu.

“RENETIL apela ba Membru sira ne’ebé iha Governu, husi Vice-PM, Ministru sira, to’o companheiro sira ne’ebé hala’o kna’ar tékniku oi-oin iha Ministériu Saúde nia laran, atu foti atendimentu saúde ba sidadaun ne’e hanesan kna’ar sagradu ida ne’ebé ita boot sira hala’o hanesan kontinuasaun ba misaun atu liberta povu. Hala’o ita boot sira nia kna’ar ho responsabilidade no kometimentu. Ba sira ne’ebé mak halo parte ba Konselho de Ministru, lori asuntu ne’e ba diskuti hamutuk no fó solusaun ne’ebé adekuadu. Karik labele rezolve problema ne’e, diak liu itaboot sira hakiduk de’it ona husi itaboot sira nia kargu”, nia apela.

Tanba ho instalasaun Governu Konstitusional da sia, povu iha esperansa hanoin katak problema sira ne’e bele hetan solusaun, no kobertura no kualidade atendimentu saúde iha Timor-Leste sai di’ak liután. Esperansa ba ida ne’e mos sai boot liu tan tanbá fatór rua;

“Partidu sira ne’ebé konstitui Governu Konstitusional da-IX hotu-hotu iha agenda klaru kona-ba saúde. Iha sira nia kampaña eleitorál, hanesan Partidu CNRT kompromete atu dezenvolve área saúde ida ne’ebé inkluzivu ho kualidade”. No Partido Demokrátiku hatete dezenvolve setór saúde, hadi’a Hospital Nacional Guido Valdares no hospital iha munisípiu sira”, nia afirma.

Alende ne’e, Iha fulan junñu 2023, RENETIL hamutuk ho CNC halo diskusaun nakloke ida iha edifisiu Komarka Balide ho tema “Sistema Saúde Nu’udar Instrumentu ba Libertasaun Povu”. Diskusaun ida ne’e mós identifika problema sira hanesan falta aksesibilidade populasaun iha área remota ba fasilidade saúde, falta ekipamentu médiku no ai-moruk hodi fó atendimentu saúde ne’ebé aksesivel no ho kualidade ba povo tomak;

Kona-ba rekursu umanu iha área saúde, haree hosi kuantidade, kualidade no distribuisaun, ladauk naton atu garante asesibilidade no fornese atendimentu saúde ho kualidade ba populasaun tomak.

Tuir dadus MS profisional saúde hanesan médiku, enfermeira, parteira no tékniku sira hakotu kontratu ho termu sertu hamutuk 2.256. Entretantu estoke ai-moruk ne’ebé mamuk iha Hospital Nasionál Guidu Valadares hamutuk 121 ka 20%.

Notísia relevante: Komisaun F halo fiskalizasaun urjente ba INFPM haree problema aimoruk “stock out”

Jornalista: Jesuína Xavier

Editór     : Florencio Miranda Ximenes

iklan
iklan

Leave a Reply

iklan
error: Content is protected !!