DILI, 16 janeiru 2024 (TATOLI) – Diretór Ezekutivu Institutu Nasionál Farmasia no Produtu Médiku (INFPM), Brígido Simão Dias de Deus, hateten Empreza Sali-Magu Unipesoal Lda, importa ona ai-moruk item rua hanesan parasetamol ho salbutamol, enkuantu sei hatama tan ai-moruk kontentór haat iha 22 to’o 25 janeiru ho objetivu atu responde falta ai-moruk iha Timor-Leste.
‘’Horseik Kompañia Sali-Magu Unipesoal Lda hatama ona ai-moruk item rua mai INFPM hanesan parasetamol no salbutamol, nune’e, iha semana oin, kompañia sei hatama tan ai-moruk kontentór haat mai Timor-Leste’’, Brígido Simão Dias de Deus hateten ba jornalista iha INFPM Kampu Alor, ohin.
Brígido akresenta katak Empreza Sali-Magu haruka tan ai-moruk balun husi Austrália no iha ona dalan atu mai Timor-Leste.
“Bainhira ai-moruk sira hatama mai, ita bele responde ona situasaun ne’ebé agora ema hotu preokupa, mais ha’u sente situasaun normál ka ladún hanesan ema ko’alia iha públiku”, nia esplika.
Nia afirma, INFPM estoke ai-moruk hanesan vitál 84% esensiál 75% no nesesáriu iha 84%, maibé bainhira ai-moruk tama hotu mak bele responde di’ak liután ba populasaun sira-nia nesesidade.
“Ita presiza ai-moruk item1.400-resin, agora daudaun iha ne’e porvolta 600-resin item, maizumenus 400-resin item mak la iha, entaun ai-moruk sira ne’e kuandu tama mai iha semana oin mak sei asegura no bele to’o fulan tolu hodi responde ba povu nia preokupasaun”, nia haktuir.
Notísia relevante : INFPM deklara Sali-Magu sei hatama ai-moruk item 88 iha janeiru
Jornalista : Felicidade Ximenes
Editór : Zezito Silva
