DILI, 16 janeiru 2024 (TATOLI) – Diretór Jerál Diresaun Servisu Rejistu Notariadu (DGSRN), Joao Fernando Martins Borges, dehan Passaporte hamutuk 20.650 to’o ona (chega) iha Timor-Leste maibé seidauk fó atendimentu tanba sei hein lansamentu ba ajenda online Dili nian, enkuantu iha munisípiu seidauk tanba presiza reune ho diretór notariadu munisipál sira.
“Los duni, kaderneta 20.650 to’o ona iha Timor-Leste horseik no ami mós simu kedan horseik hodi lori mai iha edifísiu notariadu maibé ita seidauk fó atendimentu tanba ita hein lansamentu ajenda online Dili nian, maibé munisípiu sira seidauk bele tanba presiza halo reuniaun ho diretór sira servisu notariadu munisipál sira hodi koalia kona-ba númeru atendimentu Passaporte kada loron, tanba ita sei halo atendimentu liuhosi ajendamentu online”, João Fernando hateten ba jornalista sira iha kna’ar fatin Colmera, tersa ne’e.
Borges afirma, Ministériu Justisa sei iha hela faze preparativu ba lansamentu ajenda online maibé sei lansa iha tempu badak. Ajenda online ne’e ho objetivu atu evita ema labele forma baruk.
“Neste momentu, ita sei iha hela faze preparasaun ba lansamentu ajendamentu online tanba ne’e mak ita seidauk loke atendimentu ba públiku”, nia dehan.
Nia mensiona, ajendamentu ne’e kompostu hosi modu haat mak atendimentu Passaporte Billete Identidade, Rejistu Kriminál no tratamentu ba Sertidaun Moris.
“Kona-ba Passaporte, rekerente sira bele aplika hosi uma de’it, presu ba Passaporte nafatin $100, $75 no $50. Kuandu aplikante sira priénse hotu ona, ba selu iha banku no lori nota ba hatudu iha notariadu no hodi foti Passaporte”, nia afirma.
Nia dehan, Ministériu Justisa sei fó atendimentu, loron ida ba ema 140, kuandu liu mak sistema sei taka automátika. Prosesu atendimentu ba aplikasaun Passaporte online simu de’it aplikante 70 iha sesaun dader no ema 70 iha parte loraik.
“Sira mai hasai só hasai foto de’it, tanba dokumentu hotu aplika ona iha ajendamentu online, depois ba selu iha banku, lori resivu banku nian hafoin entrega resivu ba notariadu sira foin entrega Passaporte,” João Fernando.
Notísia relevante : Hein tan Kaderneta Passaporte rihun 57 tanba faze dahuluk hotu
http://Kaleideskopia: MJ konsege rezolve kaderneta passaporte
Jornalista: Natalino Costa
Editór : Zezito Silva
