PN hato’o votu pezár ba vítima dezastre naturál iha Japaun
DILI, 16 janeiru 2024 (TATOLI)—Parlamentu Nasionál (PN), tersa ne’e, liuhosi reuniaun plenária aprova votu pezár no solidarizasaun ba vítima dezastre naturál afeta hosi rai nakdoko iha Japaun foin lalais.
“Rezultadu votasaun ba povu pezar a-favór 50, kontra no abstensaun 0,” Prezidente Parlamentu Nasionál, Maria Fernanda Lay, hato’o iha sala plenária.
Ho aprovasaun ne’e, PN hato’o votu pezár no solidarizasaun ba vítima dezastre naturál afeta hosi rai nakdoko iha Japaun foin lalais.
Relasiona ho rai nakdoko ho magnitude 7,6 iha eskala ne’ebé to’o Peninsula Noto iha Ishikawa, Japaun, iha segunda (01/02).
Dezastre naturál ne’e estraga edifísiu no estrada no ema hamutuk na’in-84 lakon vida, kanek 300-resin no ema atus ba atus mak lakon.
Aleinde ne’e komunidade kontinua laiha bee no naroman, enkuantu ekipa salvasaun kontinua buka sobrevivente sira.
Entretantu, Ajénsia Metrolójia Japaun informa katak akontese mós rai nakdoko kontinuasaun dala-155 hahú kedas hosi loron dahuluk rai nakdoko.
Dadaun ne’e, komunidade Ishikawa hamutuk 62 mak mate no ekipa kontinua buka abitante seluk.
Aleinde iha Ishikawa, deteta mós rai nakdoko iha fatin seluk iha Japaun hanesan Niigata, Toyama, Fukui, Nagano, Gifu, Tokyo, Yamagata, Fukushima, Ibaraki, Tochigi, Gunma, Saitama, Shizuoka, Aichi, Mie, Shiga, Kyoto, Osaka, Hyogo, Nara, Tottori, Iwate, Miayagi no Akita.
Jornalista : Nelson de Sousa
Editór : Cancio Ximenes
