COVALIMA, 16 janeiru 2024 (TATOLI) – Alfándega no Polísia Nasionál Timor-Leste (PNTL) devolve motór ida ho marka Vixion ba Bea Cukai Indonézia iha fronteira Mota Masin, postu administrativu Tilomar, munisípiu Covalima.
Motór ne’e sidadaun indonéziu ida nian ne’ebé lakon no hato’o keixa, nune’e PNTL simu informasaun hodi buka tuir, tanba timoroan ida mak hatama motór ho dalan ilegál no tau hela iha nia fatin, iha aldeia Klauhalek, suku Belulik Leten, postu administrativu Fatumea, iha setembru 2023.
Ho informasaun ne’ebé iha, Polísia liuhusi seksaun investigasaun Covalima halo revista ba motór no nia númeru mákina hanesan ho sidadaun indonéziu nian ne’ebé lakon. Nune’e, PNTL husu ba timoroan ne’ebé importa motór ho dalan ilegál atu entrega ba polísia no nia devolve hodi halo prosesu iha Ministériu Públiku.
“Bazeia ba despaixu husi Ministériu Públiku, liuhusi Komandu PNTL ami halo koordenasaun, nune’e ami komunika ho Bea Cukai Indonézia no ohin ita reentrega motór Vixion ida”, Diretór Alfándega, Nuno Nogueira, dehan iha fronteira Mota Masin.
Diretór esplika katak atu halo prosesu ba autór ida ne’e kompeténsia husi Ministériu Públiku no Alfándega haree de’it ba prosesu administrativu hodi fó fila motór ne’e ba parte Indonézia.
Alfándega mós sei haree ba sidadaun ne’ebé importa motár ho legál, nune’e aplika sansaun bazeia ba tipu motór ne’ebé importa, liuhusi fronteira Mota masin.
Ho kestaun ne’e maka nia husu ba sidadaun sira atu importa motór ho dalan legál no Alfándega sei fasilita sira, tanba selu taxa ladún boot. Kada motór ki’ik aplika taxa $50.
Kepala Hanggar Bea Cukai Mota Masin Indonézia, Yebvika Mariany Adoe, hatete nia simu informasaun husi Alfándega Timor-Leste no halo koordenasaun ho polísia Indonézia hodi buka hatene sidadaun husi indonezia nia motór lakon no sei entrega ba nia na’in.
“Sidadaun indonéziu nia motór lakon iha setembru liubá no nia hato’o keixa ba polísia Indonézia hodi halo koordenasaun ho polísia Timor-Leste. Hafoin ne’e PNTL hetan motór no ohin devolve mai Bea Cukai”, dehan.
Jornalista: Celestina Teles
Editora: Maria Auxiliadora
