DILI, 16 janeiru 2024 ( TATOLI) – Prezidente Komisaun Permanente Rekrutamentu ba kontratadu iha Ministériu Saúde, Julio dos Santos, informa katak profisionál saúde ne’ebé rekrutadu hosi Ministériu Saúde (MS) iha faze dahuluk hamutuk 229, hirak ne’e sei halo atendimentu ba pasiente sira iha Hospitál Nasionál Guido Valadares (HNGV) iha 17 janeiru 2023.
”Ami halo rektutmentu iha faze dahuluk haree liubá HNGV, tanba iha munisípiu sira, moras hotu halo transferénsia mai hotu ne’eba, entaun ita haree uluk neseidade HNGV mak pesoál saúde sira hamutuk 229 mak liu vaga no hahú aban hala’o ona servisu atendimentu ba pasiente sira’,’ Julio dos Santos dehan iha INFPM, ohin.
Nia afirma, profisionál saúde sira ne’e asina ona kontratu ho Ministériu Saúde horseik (15/01) no entrega on aba HNGV atu ezekuta servisu.
”Númeru profisionál saúde ne’e husi médiku, enfermeiru, parteira, tékniku aliadu ne’ebé mak ita tau iha HNGV atu hala’o servisu tuir ita-nia planu, maibé HNGV sente ladún sufisiente mak HNGV tenke halo mapamentu hodi hato’o mai Ministra Saúde atu ita bele aumenta númeru ida-ne’e”, nia informa.
Nia esplika, profisionál saúde ba servisu sentrál, munisípiu, INFPM no servisu ambulánsia, daudaun ne’e, tama ona iha faze entervista no tempu badak hahú atende ona pasiente sira.
Iha sorin seluk, Ministra Saúde Elia dos Reis Amaral, revela rekrutamentu ba profisionál saúde sira ne’ebé mak MS loke mak hahú uluk iha HNGV.
“Ita-nia profisionál saúde sira-ne’e hahú fó atendimentu uluk iha HNGV iha semana ne’e hamutuk 229, depois faze tuir mai ba munisípiu sira servisu sentrál sira, INFPM no servisu ambulánsia’,’ nia konklui.
Notísia relevante :http://Profisioál Saúde 2.256 kontratu konklui no MS foin rekruta no sei simu 229
Jornalista : Felicidade Ximenes
Editór : Zezito Silva
