iklan

COVALIMA, HEADLINE

Aldeia lima iha Suai presiza infraestrutura bázika

Aldeia lima iha Suai presiza infraestrutura bázika

Administradór postu administrativu Suai, Luzinho do Rego. Imajen/Celestina Teles.

COVALIMA, 17 janeiru 2024 (TATOLI) –  Abitante iha aldeia Tobur, Teda, Tudilpo, Gala no Halik iha suku Beco, postu administrativu Suai dezde tempu okupasaun Indonézia seidauk asesu ba infraestrutra bázika hanesan eletrisidade, estrada no bee-moos.

Administradór postu administrativu Suai, Luzinho do Rego, triste tanba postu Suai ne’e iha kapitál munisípiu nian, maibé tinan naruk populasaun iha suku Beco seidauk asesu eletrisidade, estrada ne’ebé di’ak no fornesimentu ba bee-moos.

Luzinho do Rego salienta katak abitante sira iha aldeia lima dezde okupasaun Indonézia uza mak painél solár, nune’e iha tempu kalan sira bele hetan naroman.

Kona-ba estrada, iha tinan 2013, Institutu Jestaun Ekipamentu, Institutu Publiku loke ona dalan, maibé iha tempu udan sira labele asesu tanba kodisaun ladi’ak no seidauk tau alkatraun.

Ba preokupasaun komunidade nian, Autoridade Covalima iha responsabilidade hato’o ona proposta ba Ministériu Obra Públika no nia rezultadu mak estrada ne’e tama iha projetu R4D, maibé seidauk implementa tanba orsamentu la sufisiente.

Aldeia Tobur iha nia xefe família 65 ho populasaun 346, Teda iha família 158 ho populasaun 680, Gala iha família 78 no populasaun 397, Tudilpo iha família 121 no abitante 547 no aldeia Halik iha família 61 ho nia populasaun 288.

Diretór Servisu Obra Públika, Alberto Cardoso, afirma katak maioria populasaun iha Covalima asesu ona estrada rurál, maibé bainhira tempu udan komunidade sira difísil atu liu tanba kondisaun ladi’ak.

Alberto Cardoso salienta katak ba abitante sira iha suku Beco ne’ebé seidauk asesu estrada ne’e tama ona iha planu no dokumentu submete ona ba iha nasionál, nune’e hein de’it desizaun atu implementa.

Liga ba asesu eletrisidade, tuir dadus EDTL Covalima, munisípiu ne’e iha suku 30 no aldeia 148, hosi númeru ne’e aldeia 123 mak iha ona eletrisidade, seluk tama iha faze konstrusaun no levantamentu dadus no suku Beco nia aldeia lima refere tama iha faze lavantamentu dadus ne’e.

Kona-ba fornesimentu bee-moos, Koordenadór BTL Covalima, Castro Dody Ramos, antes ne’e fó sai katak kliente iha área urbana ne’ebé asesu ona bee-moos iha família hamutuk 1.222 ka populasaun na’in-11.533.

Lembra katak iha vizita Sekretáriu Estadu Eletrisidade Água no Saneamentu, Santos Noronha, foin lalais iha munisípiu refere, nia promete sei orienta tékniku Bee Timor-Leste iha Covalima halo levantamentu dadus ba komunidade ne’ebé seidauk asesu bee-moos.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!