iklan

DEFEZA, HEADLINE

 Falur kompromete fó atensaun ba Polísia Militár

 Falur kompromete fó atensaun ba Polísia Militár

Reprezentante sira foto ho Busto Saudozu Komandante Venáncio Ramos Amaral (Ferraz) sai hanesan Patronu Unidade Polísia Militar, iha Unidade Polísia Militar Kintal Boot Dili, Kuarta (17/01). Imajen Tatoli/Francisco Sony

DILI, 17 janeiru 2024 (TATOLI) – Xefe Estadu Maiór Jenerál F-FDTL, Tenente Jenerál, Domingos Raul Falur Rate Laek, pretende fó atensaun ba Unidade Polísia Militár (PM) atu sai profisionál no sai referénsia hodi servi públiku.

“Bá Polísia Militár iha tinan ida-ne’e, ha’u hakarak fó importánsia atu hadia koñesimentu no abilidade atu eduka Polísia Militár. Hasae relasaun di’ak iha sosiedade no hadia prosesu administrativu sira, atu imi bele sai hanesan referénsi hodi servi ita nian públiku”, Falur iha nia intervensaun bainhira partisipa iha serimónia aniversáriu ba ezisténsia Polísia Militár ba dala-19 ne’ebé maka hala’o iha Kuartel PM Kintál Bo’ot, kuarta ne’e.

Iha tinan ida-ne’e ha’u husu ba  Polísia Militár atu atua ho dedikasaun no auto sakrifísiu hodi servi instituisaun no Estadu”, nia adianta

Falur hateten, responsablidade bo’ot ne’ebé mak Polísia Militár iha mak atu kuida prinsípiu FALINTIL-FFDL, tau matan didiak ba istória no fó onra hodi kumpre sosiedade nian hakarak.

“Ha’u fiar katak ita bo’ot sira nia ezisténsia hodi servi, imi maka oan mane hosi povu Timor-Leste, tanba razaun hirak ne’e mak Polísia Militár instituisaun ida tinan-19, nudar patrimóniu povu nian, nudar instituisaun Estadu nian”, nia afirma.

“Polísia Militár la’os de’it rejiliente, maibé rejiste hasoru presaun sira hodi hadia sira-nia aan, kurije falla hosi hahalok la di’ak, posizaun sira ne’ebé sira aprende katak ita presiza halo di’ak liu no di’ak liután. Ida-ne’e nudar aktu ida hodi reforsa papél Estadu nian ba defeza sosiadade nian no fó importánsia ba ita-nia forsa militár sira tuir tuir lejislasaun ne’ebe vigora ona”, nia hatutan.

Falur agradese ba parseiru dezenvolvimentu sira hanesan Repúblika Federativa Brazil , Repúbliku Popular Xina no sira seluk ne’ebé apoiu makas ba ita-nian formasaun rekursu umanu, apoia lojístika hodi tun hala’o kna’ar Polísia Militár nian.

Iha fatin hanesan, Tenente Jenerál Reformadu Lere Anan Timur husu ba membru F-FDTL liuliu Polísia Militár atu hatudu profisionalizmu bainhira halo servisu.

“Husu ba militár sira, imi tenke firme iha imi-nia posizaun hanesan miltár, hanesan profisionál militár, hatudu lealidade ba komandu hodi labele fasil monu ba polítiku sira-nia manobra. Imi-nia kadeia Komandu tenke metin, imi-nia ierarkia militár ne’e tenke metin no komandu ida de’it”, nia fó-hanoin.

Lere kongratula ba membru PM hodi kontinua eziste, ohin selebra aniversáriu PM nian ba dala-19, Polísia Militár tenke hatudu servisu di’ak.

“Dala ida tan parabens ba polísia militár ne’ebé halo tinan-19, imi iha doutrina imi iha estatutu, imi-nia komandante bele troka malu no soldadu troka malu maibé prinsípiu nafatin servisu ba povu no rai ida-ne’e”, Lere hateten.

Komandante Unidade Polísia Militár Maijór Mateus de Jesus haktuir, PM ejZiste iha 2005 no totál efEtivu Polísia Militár agora iha nain 220.

Jornalista:Natalino Costa

Editór : Zezito Silva

iklan
iklan

Leave a Reply

iklan
error: Content is protected !!