iklan

EKONOMIA, HEADLINE

Hahú ohin, Alfa Dili fa’an foos subsídiu ‘Golden Star’

Hahú ohin, Alfa Dili fa’an foos subsídiu ‘Golden Star’

Jerente Alfa Dili Unipessoal, Paul Sarmento. Imajen Tatoli/Afonso do Rosário

DILI, 17 janeiru 2024 (TATOLI)Empreza importadora Alfa Dili hahú ohin fa’an ona foos subsídiu faze daruak hosi Governu ho marka ‘Golden Star’, iha Audian.

“Ami hahú fa’an foos ho marka Golden Star, kilograma 25 ho folin $11,50, ami fa’an durante fulan-tolu, hahú ohin to’o 16 marsu 2024,” Jerente Loja Alfa Dili, Paul Sarmento, informa ba Agência Tatoli, iha loja Alfa Dili, Audian, kuarta ne’e.

Foos importadu ne’ebé fa’an hosi nasaun Índia, ho kuantidade hamutuk tonelada 7.500, ekivalente saka 300.000.

Empreza sei fa’an fazeadamente durante fulan-tolu, ne’ebé kada fulan fa’an tonelada 2.500 ba populasaun.

“Ami fa’an iha Dili de’it, ba munisípiu empreza sira sei sosa hosi ami mak fa’an. Maibé ho ninia regra, tanba Governu define ona nia presu depende ba distánsia hosi Dili bá munisípiu,” nia akresenta.

Notísia relevante : Empreza importadór rua sei ezekuta subsídiu foos faze daruak

Alfa Dili garante katak durante fulan-tolu nia laran foos Golden Star sei to’o iha komunidade área rurál sira tanba iha kontratu ne’e Governu fó fiar ba empreza implementadór sira hodi tau foos tonelada 7.500.

“Kontratu fulan-tolu ne’e bainhira ramata, atu renova ne’e depende ba Governu, se Governu hakarak extende, ami prontu halo tuir atu importa tan foos,” nia akresenta.

Jerente empreza dehan, kona-ba kualidade foos, bainhira sasán ida sai hosi nasaun ida sempre pasa hosi teste laboratóriu.

“Foos tonelada 7.500 ne’ebé ita fa’an, tuir kontratu entre Governu ne’e ho valór orsamentu bazeia ba sasán ne’ebé ami fa’an, ezemplu ami fa’an fooos saka ida, ne’e Governu fó mai ami $5 kada saka,” Paul esplika.

Kritéria empreza sira atu ba sosa foos subsídiu iha armazein Alfa Dili, mak obrigatóriu tenke aprezenta karta deklarasaun kona-ba lisensa komersiál, inklui aprezenta mós kartaun eleitorál, billete identidade (BI) ka kaderneta pasaporte.

“Husu ba maluk sira ne’ebé hakarak atu sosa saku ida ka rua de’it, labele mai sosa iha Alfa Dili, maibé bele bá sosa iha retallista ne’ebé mak mai sosa ho kuantidade boot, tanba se ami fa’an saku ida ka rua, komunidade mai sosa tiha entaun retallista ne’ebé hanesan ami nia langganan ne’e atu bá sosa fali iha ne’ebé,” nia dehan.

Iha fatin hanesan, Retallista, Osvaldo Tavares, hosi Bobonaro, konsidera laiha dalan ba empreza atu halo mudansa ka manipula sasán tanba antes sira atu sosa, iha ona akordu ho loja Alfa Dili.

“Ami asina ona akordu ida entre empreza fornesedór ho ami (retallista) ne’ebé define kona-ba valór fiksu ba kada foos. Tanba ne’e ami labele halo manipulasaun ba presu tanba ida-ne’e Governu fó ona subsídiu. Agora ha’u sosa saka 500 hodi fa’an iha Bobonaro Vila, maibé foos sira ne’e sei lori bá fa’an iha suku sira iha área remota tanba ami iha obrigasaun hodi kumpre kontratu ne’ebé ami asina ho empreza fornesedór atu fa’an tuir presu estabelesidu,” Jerente esklarese.

Folin másimu iha Dili no munisípiu sira mak hanesan iha armazein Alfa Dili saka ida kilograma 25 ho folin $11,50, sosa no fa’an iha Dili, kilograma 25 ho folin $12,50, enkuantu ba Ermera, Aileu, Liquiçá Baucau, Manatuto fa’an kilograma 25 ho folin $13, ba Bobonaro, Ainaro kilograma 25 ho folin $14, Lautém, Manufahi, Viqueque kilograma 25 ho folin $14 no Rejiaun Administrativa Espesiál Oé-cusse Ambeno (RAEOA) no Ataúro fa’an kada saka kilograma 25 ho folin $14,50.

Jornalista     : Arminda Fonseca

Editora         : Julia Chatarina

iklan
iklan

Leave a Reply

iklan
error: Content is protected !!