DILI, 17 janeiru 2024 (TATOLI)—Ministru Transporte no Komunikasaun, Miguel Marques Gonçalves Manetelu, sei asina akordu rua ho Indonézia no akordu bilaterál ida ho Malázia.
Akordu ne’ebé sei selebra ho Indonézia iha área komunikasaun no informátika no seluk iha área edukasaun no formasaun iha área transporte nian, enkuantu ho Malázia akordu bilaterál iha área transporte aérea.
“Ho ida-ne’e, ezekutivu sira liuhosi reuniaun Konsellu Ministru (KM) delibera no aprova ona projetu ne’ebé aprezenta hosi Ministru Transporte no Komunikasaun, Miguel Marques Gonçalves Manetelu,” Ministru Prezidénsia Konsellu Ministru, Agio Pereira, relata hafoin reuniaun, iha Palásiu Governu, kuarta ne’e.
Notísia relevante : Akordu Vou TL-Malázia Sei iha Prosesu
Biban ne’e, KM atribui mós poder ba Ministru Manetelu hodi asina nota entendimentu rua ne’e ho Indonézia inklui akordu servisu aéreu ho Malázia.
Inisiativa ne’e hodi dezenvolve no loke tan setór komunikasaun no informátika, nune’e mós dezenvolvimentu iha setór transporte no komunikasaun, ne’ebé ezije kolaborasaun proativu no asertiva ida ho país sira seluk hodi hasa’e afikásia iha atuasaun interna no externa.
Iha sorin seluk, Ministru Miguel, hateten, nota entendimentu ne’ebé sei selebra ho Ministériu Komunikasaun no Informátika Indonézia iha área komunikasaun no informátika, enkuantu ho Ministru Transporte iha área edukasaun no formasaun iha área transporte nian.
Governante ne’e informa, ligadu ho akordu servisu aéreu nia prosesu naruk oitoan, bainhira asina tiha tenke lori ba Parlamentu hodi ratifika maka foin iha efeitu.
“Ne’e para aviaun komersiál hosi Malázia bele tama mai ona Timor, uluk iha maibé charter Flight, tanba ita besik sai membru plenu ASEAN, ne’ebé kondisaun bele ladi’ak ba mós sira husu ita tenke avansa ho asinatura,” Manetelu akresenta.
Jornalista : Antónia Gusmão
Editora : Julia Chatarina
