iklan

HEADLINE, SAÚDE

Tempu udan, husu kada uma-kain limpeza hodi evita moras dengue

Tempu udan, husu kada uma-kain limpeza hodi evita moras dengue

Susuk Dengue.Imajen/TATOLI

DILI, 17 janeiru 2024 (TATOLI) – Diretora Servisu Saúde Munisípiu Dili (SSMD), Agostinha Segurado, alerta Servisu Saúde Munisípiu Dili, iha janeiru, semana daruak no datoluk nian, rejista ona kazu dengue hamutuk 27, tanba ne’e, husu ba ema hotu atu limpeza iha kada uma-kain.

”Iha fulan janeiru ne’e, iha semana dahuluk, ita la rejista kazu, maibé iha semana daruak kazu dengue hamutuk 11 no semana datoluk iha 16, tanba ne’e husu ba ema hotu atu limpeza iha ida idak nia uma”, Agostinha Segurado, hateten iha nia kna’ar fatin Formoza, ohin.

Maske nune’e, SSMD to’o agora seidauk rejista ema mate tanba moras dengue maibé pasiente sira-ne’e hotu rekuperadu no fila ba uma.

“Kazu dengue afeta ba labarik tinan ida to’o tinan haat depois ba ema adultu ho idade 14-24”, nia relata.

Nia esplika, kazu dengue ne’e maioria mai husi Postu Administrativu Vera Kruz, hamutuk na’in sia, Cristo Rei na’in ualu, Dom Aleixo na’in neen no Na’in Feto haat.

”Intervensaun ne’ebé mak ekipa saúde sira halo mak nafatin tama sai uma hodi aviza ba komunidade atu limpeza jerál iha sira-nia bairo, suku no aldeia atu prevene kazu dengue ida-ne’e tanba ita-nia aimoruk kímiku hanesan abate no fomigasaun ita sufisiente atu atende ba kazu sira ne’e”, nia konklui.

Dengue hanesan moras hadaet ida ne’ebé mai hosi virus lori hosi susuk ho naran aedes aegypti no aedes albopictus. Susuk baibain tolun iha bee laran no moris iha bee nalihun laran, liuliu iha tempu udan. Susuk tata ema iha tempu loron, hahú hosi tuku 6:00 dader to’o tuku 10:00 no tuku 15:00 to’o tuku 18:00 lorokraik.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!