DILI, 18 janeiru 2024 (TATOLI)—Empreza importadór, Creative Furak, daudaun ne’e seidauk bele implementa subsídiu foos ba faze daruak, maski iha ona akordu ho Governu.
Asistente Jestór Creative Furak, Yaty Zaka, hateten, loloos hafoin asina akordu bele implementa ona maibé sei hein karimbu.
“Ami seidauk implementa tanba ko’alia ona ho Governu katak ami-nia foos sei tau karimbu hakerek subsídiu ho objetivu ema labele halo manipulasaun ba folin foos iha área remota sira, tanba antes ne’e retallista sira balu mai sosa iha ami no áa fa’an fali iha área remota ho folin la tuir saida mak Governu estabele ona,” Yaty Zaka, informa ba Agência Tatoli, iha Bidau, kinta ne’e.
Notísia relevante : Empreza importadora rua sei ezekuta subsídiu foos faze daruak
Nia dehan, bainhira empreza tau ona karimbu mak retallista sira fa’an ho folin la tuir regra, komunidade iha direitu hato’o keixa ba Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA,I.P) no Ministériu Komérsiu Indústria (MKI).
“Tuir akordu ne’ebé ita halo ho Governu atu implementa foos subsídiu ho durasaun fulan-tolu, no daudaun ne’e karimbu iha dalan ona no ita sei implementa iha fulan ne’e nia laran,” nia akresenta.
Tuir akordu Empreza Creative Furak sei fa’an foos ho marka Beruang kilograma 20 ho kuantidade hamutuk tonelada 7.500, sei fa’an fazeadamente, kada fulan fa’an tonelada 2.500.
“Kona-ba folin, antes ne’e $9 maibé ami sei ko’alia filafali ho Governu atu mantein ka mudansa, ne’ebé ami seidauk bele fó sai folin, karik atu fó sai bainhira implementa,” nia tenik.
Jornalista : Arminda Fonseca
Editora : Julia Chatarina
