Governu sei prodús dekretu lei hodi garante investór estranjeiru
DILI, 18 janeiru 2024 (TATOLI) – Ministru Planeamentu Investimentu Estratéjiku (MPIE), Gastão Sosa, dehan sei koordena ho ministériu hotu atu kria dekretu Governu no regulametnu ho objetivu atu garante no asegura investór internasionál sira ne’ebé prefere investe mai Timor-Leste.
“Iha forúm bussines ne’ebé hala’o iha tinan kotuk, investór lubuk ida hosi nasaun hothotu mai partisipa, ha’u ko’alia ba sira katak ministériu ne’e foin mak eziste iha 2015, entaun ami sei haree oinsa aprova dekretu Governu ruma no regulamentu hodi garante investór sira mai kuda sira nia osan iha ne’e, tempu besik ami sei koordena ho ministériu sira hotu atu haree ba asuntu ne’e”, Gastão hateten ba jornalista sira iha Palásiu Prezidensiál, ohin.
Ministru subliña, liña ministeriál hirak ne’ebé sei koordena mak Ministériu Justisa, Ministériu Obras Públiku (MOP), Ministériu Transporte Komunikasaun (MTK) no seluk tan.
“Ministériu Obras Públiku atu haree ba bee, eletrisidade, Ministériu Justisa tenke haree ba estatutu rai, Ministériu Transporte Komunikasaun tenke haree ba liña internet, Ministériu Interiór haree ba seguransa tanba buat sira ne’e hotu ita tenke haree tanba ema mai investe sira-nia osan mak tenke garante buat sira ne’e hotu, kona-ba lei tenke iha lei ida ne’ebé fó garantia ba investór sira, entaun Governu sei estuda hodi haree atu ita-nia investór sira mai karik labele tauk”, nia adianta.
Nia haktuir, investór hosi nasaun lubuk ida mak interesadu atu investe iha Timor-Leste iha área oioin, maibé Ministériu Asuntu Ekonómiku ne’ebé lideradu hosi Francisco Kalbuadi Lay haree oinsa akumula pedidu hosi investór sira atu Governu aprova ona dekretu lei investimentu nian, investór sira bele mai halo investimentu.
“Ami hotu iha Governu tenke tur hamutuk atu foti desizaun tanba atu hatama investór mai ne’e la’os ha’u mesak nia kompeténsia, ha’u fó ezemplu; sé investór ida hakarak mai loke fábrika iha Baucau tenke hatene uluk, rai ne’e sé nian, komunidade nian ka Estadu nian, ita presiza haree didiak, ha’u la promete maibé iha tempu besik Governu sei rezolve buat balu kona-ba oinsa mak atu lori investór mai investe”, nia konklui.
Jornalista: Hortencio Sanchez
Editór : Zezito Silva
