iklan

BAUCAU, HEADLINE, MUNISÍPIU, POLÍTIKA

MAE sei revee estratéjia desentralizasaun administrativa no instalasaun bá órgaun reprezentativu podér lokál

MAE sei revee estratéjia desentralizasaun administrativa no instalasaun bá órgaun reprezentativu podér lokál

Ministru Administrasaun Estatál, Tomás do Rosário Cabral. Imajen Tatoli/Francisco Sony

BAUCAU, 18 janeiru 2024 (TATOLI) –Governu liuhosi Ministériu Admistrasaun Estatal (MAE), sei halo revizaun ba rezolusaun governu númeru 11/2019, 13 marsu kona-bá ezekusaun estratéjia desentralizasaun administrativa no instalasaun órgaun reprezentativu podér lokál.

Ministru Admistrasaun Estatal, Tomás do Rosário Cabrál, esplika, governu sei halo revizaun ba rezolusaun ne’e atu kria kalendáriu ba implementasaun desentralizasaun administrativa ho prioridade tinan-tolu, hahú hosi 2024 to’o 2026, ho objetivu avalia kondisaun minima molok tama bá eleisaun munisipál

“Lejizslasaun sira iha hotu ona, agora presiza de’it vontade atu reforsa kondisaun iha kraik,” Ministru Admistrasaun Estatal hateten iha Sentru Konvensaun Baucau (CCB, sigla portugés) Vila Antiga, kinta ne’e.

Maibé, Ministru Administrasaun Estatál la esplika detallu kona-bá razaun revee rezolusaun governu númeru 11/2019, 13 marsu kona-bá ezekusaun estratéjia desentralizasaun administrativa no instalasaun órgaun reprezentativu podér lokál ne’e.

Governu aprova rezolusaun governu númeru 11/2019, 13 marsu ne’e bazea ba Konstituisaun RDTL artigu 5 númeru 1, ne’ebé determina estadu respeita organizasaun territorial, prinsípiu desentralizasaun iha administrasaun públika no instalasaun órgaun reprezentativu podér lokál, ne’ebé sei benefísia aprovasaun kalendarizasaun asaun nian.

Prezidente Repúblika promulga ona proposta-lei podér lokál no desentralizasaun administrativa, lei eleitorál munisipál, lei finansa munisipál no oras ne’e governu halo hela hela ezersísiu hodi tama ba ezekusaun lei hirak-ne’e.

Tomás Cabral fó-sai katak, durante faze preparasaun sei iha avaliasaun hosi nasionál nune’e bainhira prienxe ona kondisaun mínima sei implementa Lei Podér Lokál no Desentralizasaun Administrativa liuhosi eleisaun munisipál hodi hili direita prezidente inklui vise-prezidente autoridade munisipál no membru asembleia munisipál liuhosi reprezentante partidu polítiku sira.

Autoridade munisipál sira sei halo jestaun finaseira alargada katak sei la liuhosi Ministériu Admistrasaun Estatal no Ministériu Finansas maibe sei dereita ba iha sistema tanba ne’e serbisu sekretáriu .unisipál tenki hatene elabora programa iha munisípiu enkauntu Diretór Jerál iha nasionál MAE sira sei fo deit asistensia tekniku.

Nia dehan, iha ne’e 2025, diretór jerál no nasionál sira kada ministériu sei tún direita halo serbisu iha munisípiu hotu tanba redús númeru funsionáriu públiku iha nasionál tuir orientasaun Primeiru Ministru, Kay Rala Xanana Gusmão nune’e mákina ekonomia iha baze bele la’o ho normál.

“Kuandu to’o ona iha faze eleisaun munisipál maka ita-boot sira sei kompete iha prezidente no vise-prezidenti autoridade munisipál,” Tomás Cabral akresenta.

Munisípiu Baucau iha akordu ho governu Portugés liuhosi kámara portu iha Timor-Leste hanesan kooperasaun iha área formasaun nune’e liuhosi estrutura foun presiza iha kontinuasaun liuliu kapasita rekursu umanu.

IX governu hahú establese faze foun hanesan uluk deskonsentra maibé atual delegasaun kompeténsia nune’e husu entidade hotu atu kontribui hodi serbisu hamutuk ho autoridade munisipál.

Prezidente Autoridade Munisipál (PAM) Baucau, Veneranda Eurico Marques Lemos Martins, promete durante mandantu nu’udar lideransa autoridade iha Baucau sei harii aliserse metin ba prosesu implementasaun Lei Podér Lokál no Desentralizasaun Administrativa tuir programa IX Governu Konstitusionál.

“Hau hanesan instrumentu ida de’it tanba ne’e ha’u sei la husik serbisu mesak, harii aliserse ida-ne’e metin dahuluk ha’u sei hakuak no envolve Baucau oan tomak,” Veneranda Lemos argumenta.

Notísia relevante: Infraestrutura bázika, saúde no edukasaun sai ajenda prinsipál ba Veneranda Lemos iha Baucau

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!