iklan

EDUKASAUN, MUNISÍPIU, VIQUEQUE

Ministra Dulce no Jenerál Falur inaugura edifísiu Eskola EBF iha Ossu

Ministra Dulce no Jenerál Falur inaugura edifísiu Eskola EBF iha Ossu

Ministra Edukasaun, Dulce de Jesus, hamutuk ho Xefe Estadu Maiór Jenerál F-FDTL, Tenente Jenerál, Domingos Raul ‘Falur Rate Laek’, akompana ho entidade relevante sira, inaugura Eskola EBF Falur Rate Laek, iha suku Loihunu, Viqueque, kinta (18/01/2024). Imajen Tatoli/Vitorino Lopes da Costa

VIQUEQUE, 18 janeiru 2024 (TATOLI)-Ministra Edukasaun, Dulce de Jesus, hamutuk ho Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’, kinta ne’e, inaugura Eskola Ensinu Báziku Filiál (EBF) Falur Rate Laek, iha suku Loihunu, postu administrativu Ossu, munisípiu Viqueque.

Ministra Edukasaun, haktuir, eskola ne’e eziste ona desde tinan 2015, kustu ba ninia konstrusaun kontribui hosi Jenerál Falur Rate Laek ho orsamentu apoia sosiál hodi halo konstrusaun sala haat no morru protesaun, ho enjeñaria hosi F-FDTL hamutuk ho komunidade lokál.

“Haksolok tebes haree labarik sira hamnasa ho kontente, ida-ne’e hateten mai ha’u buat rua, ida katak Eskola EBF sikulu 1,2,3 Falur Rate Laek merese duni iha estudante sira hanesan imi, ida seluk mak imi-nia hamnasa hatudu imi iha espíritu no vontade boot atu tau-matan ba edifísiu foun ida, atu kuida hanesan loron-loron imi haree Apa ho Ama sira kuida imi-nia uma laran, hamoos, soe foer iha foer fatin , rega rai, kuda aifunan ne’ebé hatudu uma nia furak no matak,” Ministra Dulce de Jesus, hateten durante serimónia inagurasaun, iha Eskola EBF Falur Rate Laek.

Notísia relevante : Fundasaun Falur Rate Laek hametin kooperasaun ho Hadomi Timor

Ministra louva Jenerál Falur tanba maski halo knaar boot ida ba nasaun, maibé bele harii fundasaun ida hodi tulun timor-oan sira ne’ebé eskola iha Portugal, Austrália, Xina no nasaun seluk ne’ebé koopera ho fundasaun.

“Ha’u pesoalmente la hatene Jenerál Falur Rate Laek nia mehi ba juventude sira, maibé ho nia esperiénsia moruk sira, hatudu katak tenke determina esperiénsia moruk ne’e ba dezenvolvementu edukasaun ida ho kualidade. Joven sira semo a’as ba mehi di‘ak sira mak imi kuda ohin loron, fini ne’ebé imi kuda iha eskola ne’e tenke buras ba futuru ida mak di‘ak ba imi. Nune’e, investe imi-nia moris ba dezenvolvimentu umanu ida ho karatéristika fiar-an, hanoin krítiku, no estuda maka’as ba futuru ida di’ak,” governante ne’e fó hanoin.

Ministra agradese Jenerál Rate Laek ba apoiu ne‘ebé mak halo ona iha eskola ida-ne’e, liu-liu ba komunidade Loihunu.

“Agradese mós ba Diretór munisípiu Viqueque, Autoridade lokál sira, liu-liu inan-aman sira, ba imi-nia serbisu hamutuk no kordenasaun di‘ak, to’o edifísiu ida-ne’e harii. Ha’u hanoin proposta harii eskola ida-ne’e atu motiva liután ita hotu atu serbisu maka’as hetan ita-nia mehi sira, liu-liu mehi ba ita-nia oan ki’ik sira,” nia akresenta.

Ministra konsidera, kestaun ne’e hanesan inspirasaun boot ida ba ita hotu liu-liu inan-aman sira atu konsidera sira-nia responsabilidade, halo edukasaun pré-eskolár sai susesu la’ós de’it iha EBF ida-ne’e maibé mos iha vida globál.

“Ita hotu sei dezenvolve. Ha’u labele hato’o iha ne’e dalan oinsa ita atu dezenvolve. Ha’u mós la bele hato’o iha ne’e dalan barak saida de’it mak halo, ha’u-nia diretór sira iha ne’e dezenvolve sira-nia an, ha’u-nia manorin sira iha ne’e kontinua apreende no sai matenek, maibé ha’u bele dehan ho momentu espesiál ida-ne’e katak ita-boot sira sei dezenvolve duni. Ita-Boot sira sei kontinua apreende, sei kaer ita-boot sira-nia mehi ba labarik oan sira iha eskola ida-ne‘e mehi mak sira atu sai labarik apreende na’in ba moris,” Ministra tenik

Iha fatin hanesan, Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jeneral, Falur Rate Laek, haktuir, reabilitasaun eskola ida-ne’e hetan apoiu finanseiru hosi Fundu Apoiu Sosiál, hosi Eskola Hafurak no tékniku hosi Enjeñaria hosi Militár F-FDTL.

“Fundu apoia sosiál kada tinan aloka millaun $6, Xefe Estadu Maior Jeneral F-FDTL osan balun maka halo reabilitasaun no mofru protesaun ida-ne’e. Ha’u louva tebes ita-boot sira-nia sakrifísiu no serbisu hotu. Serbisu hamutuk sira ne‘e reflete konsensu ba ideál investimentu edukasaun. Loron ohin ha’u sente emosiadu, sentimentu emosionál hanesan Militar ha’u liu dala barak ona, maibé inaugurasaun ba reabilitasaun eskola ne’ebé tau ha’u-nia naran reflete responsabilidade atu fó importánsia ba investimentu iha área edukasaun,” Jenerál Falur Rate Laek hato’o.

Tanba ne’e, Jenerál Falur husu responsável no estudante sira atu kuidadu no tau-matan ba edifísiu eskola hodi uza tempu naruk.

Konstrusaun edifísiu eskola hahú iha fulan-outuburu 2022 no ramata 2024.

Nune’e mós, Administradór munisípiu Viqueque, Januário Soares ‘Bolly’, apresia ba inisiativa ba Jenerál Falur Rate Laek ne’ebé halo ona reabilitasaun ba eskola ida-ne’e hodi uza ba hanorin estudante sira.

“Agradese ba Jenerál Falur Rate Laek, ne’ebé ho laran di’ak tau importánsia ona ba edukasaun hodi halo reabilitasaun ba eskola ida-ne’e,” nia dehan.

Tuir dadus, estudante hosi EBF Falur Rate Laek husi primeiru siklu ho totál estudante na’in-134, segundu siklu na’in-258 no terseiru siklu na’in-49, enkuantu profesór permanente na’in-10, kontradu na’in-tolu no vuluntáriu na’in-tolu.

Kontrola estudante labele envolve GAM

Iha sorin seluk, Jenerál Falur husu profesór sira hosi kontrola estudante sira labele envolve ba Grupu Arte Marsiál (GAM).

“Ha’u husu ba profesór iha EBF Falur Rate Laek tenke kontrola estudante sira labele envolve-an ba organizasaun Grupu Arte-Marsiál sira-ne’ebé daudaun eziste iha Timor. Ha’u alerta ba profesór nomós inan aman sira atu tau-matan ba oan sira labele mete arte-marsiál,” nia fó hanoin.

Nia observa, suku Loihunu edukasaun naun formál barak liu kompara ho edukasaun formál.

“Tuir loloos ne’e estudante sira fó prioridade ba edukasaun formál ne’ebé ita-nia profesór sira hanorin iha eskola.” nia tenik.

Iha fatin hanesan, Koodenadór EBF Falur Rate Laek, Gilberto R. G. Amaral, hateten, nia parte simu rekomendasaun sira maibé dalaruma labele kontrola.

“Kona-ba rekomendasaun jerál loos, iha eskola ami bele hanorin no fó hanoin ba estudante labele envolve iha GAM, maibé ba fali li’ur ami labele halo buat ruma tama sistema demokrasia,” nia salienta.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!