LuGu sei reforsa liután relasaun TL-EUA

DILI, 19 janeiru 2024 (TATOLI) – José Luis Guterres (LuGu), sesta ne’e, simu ona posse hosi Preziodente Repúblika (PR) nu’udar Embaxadór foun ba Estadu Unidu Amérika (EUA) no kompromete katak sei reforsa liután relasaun di’ak entre nasaun rua.

“Ha’u simu kna’ar ne’e ho sentidu responsabilidade hodi reprezenta Estadu Timor-Leste iha Estadu Unidu, iha ne’ebá misaun prinsipál ha’u-nian mak hametin liután relasaun entre Timor-Leste ho Estadu Unidu”, LuGu dehan ba jornalista sira iha Palásiu Prezidensiál, ohin.

Nia dehan, responsabilidade ne’ebé Prezidente no Governu atribui hanesan todan boot ida maibé nu’udar timoroan sei hala’o servisu hotu ho responsabilidade.

“Ha’u sei hala’o kna’ar ho lealdade hodi servi ba intrese Estadu no povu Timor-Leste nian”, LuGu afirma.

Diplomata timoroan ne’e akresenta, servisu hothotu sei kontinua nafatin servisu ne’ebé Embaxadór tuan sira halo no husik hela.

“Ha’u ba atu kontinua de’it servisu saida mak embaxadór tuan sira halo ona, importante mak interese nasaun nian”. nia konklui.

Jornalista: Hortencio Sanchez

Editór : Zezito Silva