PN ajenda ona altera lei pensaun vitalisia
DILI, 19 janeiru 2024 (TATOLI) – Prezidente Parlamentu Nasionál (PN), Maria Fernanda Lay, hatete lei pensaun vitalisia tau ona iha ajenda parlamentár atu halo alterasaun liuhosi diskusaun iha tempu besik.
“Alterasaun ba lei pensaun vitalisia iha ona ami-nia ajenda no sei halo diskusaun, maibé sei haree tanba pensaun vitalisia ne’e la’os ba deputadu de’it maibé iha mós kargu Governu sira no Estadu tomak, entaun ita lalika haree de’it ba Parlamentu”, Fernanda Lay dehan ba jornalista sira iha Palásiu Prezidensiál, ohin.
Tuir nia, antes atu halo diskusaun hodi altera totál ba lei pensaun vitalisia mak Parlamentu Nasionál sei estuda klean tanba nasaun barak iha pensaun vitalisia no seguransa sosiál.
“Ami sei estuda no haree halo didi’ak mak halo diskusaun, tanba ha’u labele mesak hola desizaun ruma, ne’ebé ita hotu kalma, la’o ho neneik oinsa tranzita hosi pensaun vitalisia ne’e hodi ba seguransa sosiál atu la’o oinsa depois ita haree”, nia dehan.
Nia dehan, lei pensaun vitalisia muda ona iha tinan kotuk liubá bainhira ema ida asume mandatu ida iha Parlamentu, Governu no seluk tan nia iha diretu ba 65%.
“Iha lei ida uluk ne’e deputadu sira-nia oan boot ona bele hetan pasaporte diplomátiku, maibé ida ne’e ami halo mudansa ona hasai hotu, bainhira deputadu ida nia oan sei kiik mak bele hetan pasaporte diplomátiku, maibé boot ona la iha ona direitu atu hetan pasaporte diplomátiku”, nia konklui.
Jornalista: Hortencio Sanchez
Editór : Zezito Silva
