COVALIMA, 19 janeiru 2024 (TATOLI) – Postu saúde lima daudaun falta rekursu hodi halo atendimentu ba populasaun, nune’e Servisu Saúde Covalima kria ona oráriu hodi atende pasiente sira.
Diretora Servisu Saúde munisípiu Covalima, Maria de Fátima Moniz, hatete pesoál kontratadu sira iha postu lima hetan notifikasaun husi Ministériu Saúde no daudaun laiha ema atu halo atendimentu ba populasaun sira, maka pesoál saúde ne’ebé ho rejime espesiál hanesan médiku, parteira no enfermeiru iha saúde munisípiu tuun direta bá halo atendimentu iha postu saúde sira.
Postu ne’ebé mak falta rekursu mak iha Zumalai iha postu saúde Bulu, Beilaku no Kulu Oan, iha Tilomar iha postu saúde Foho-Lulik no iha Fohorem iha postu saúde Laktos.
“Postu saúde sira ne’ebé laiha pesoál, ami Servisu Saúde Munisípiu esforsu hodi kria oráriu ba atendimentu. Ba pesoál ne’ebé ho rejime espesiál hanesan médiku, parteira no enfermeiru iha saúde munisípiu tuun direta bá halo atendimentu iha postu saúde”, nia realsa.
Ho problema falta funsionáriu ne’e mak xefe sentru saúde sira esforsu jere rekursu no hetan apoiu husi Servisu Saúde Covalima.
“Iha postu Fohorem sentru saúde Laktos no Foho Lulik ita koordena ho pesoál rejime espesiál hanesan médiku, parteira na’in-ida no ha’u diretora rasik, ami na’in-ualu iha ona oráriu oinsá atu prienxe hodi kontinua halo atendimentu ba komunidade hodi hein dezisaun kontinuasaun kontratu”, nia afirma.
Oráriu bá halo atendimentu iha janeiru ne’e iha sentru saúde Foho Lulik loron ida atende pasiente 100-resin.
Ministériu Saúde (MS) ho númeru referénsia 023 notifika pesoál kontratadu sira, maibé Servisu Saúde esforsu hodi hato’o pedidu estensaun ba kontratu.
Dadus pesoál kontratadu iha postu no sentru saúde hamutuk 142, husi númeru ne’e na’in-99 Servisu Saúde hato’o pedidu estensaun, tanba nia verba mai husi Orsamentu Jerál Estadu, liuhusi Programa Malária, Tuberkuloze (TBC), VIH/SIDA, Nutrisaun no Saúde Públika hodi hein despaixu kontinuasaun kontratu husi Governu.
Ba pesoál saúde na’in-46 la kontinua sira-nian kontratu tanba sira-nian orsamentu mai husi Fundu Covid-19 no daudaun covid-19 laiha ona.
Ho kestaun falta pesoál saúde, postu Laktos ne’ebé lokaliza iha aldeia Fatuk-Laran, postu administrativu Fohorem, taka provizoriamente ba halo atendimentu loroloron ba pasiente sira.
Xefe suku Laktos, António Afonso, esplika razaun postu ne’e taka tanba pesoál saúde kontratadu ne’ebé deskata iha postu Laktos lakontinua serbisu tanba hetan notifikasaun husi Ministériu Saúde.
“Ami moras hanesan isin-manas ka me’ar konsumu de’it ai-moruk tradisionál. Ba abitante ne’ebé moras grave, ami telefone ambulánsia lori bá konsulta iha sentru saúde Fohorem no kapitál munisípiu ne’ebé dook. Ida ne’e mak situasaun ne’ebé komunidade enfrenta iha baze, tanba ne’e desizaun husi Governu no hanesan autoridade kumpre desizaun”, líder komunitáriu ne’e relata.
Postu saúde Laktos lahalo atendimentu ba ema moras liu semana ida no foin lalais pesoál husi Servisu Saúde Munisipál mak halo atendimentu, maibé la’ós loroloron.
Jornalista: Celestina Teles
Editora: Maria Auxiliadora
