iklan

DILI, KAPITÁL

Vendedór faan ikan iha Taibesi ejize Governu kria kondisaun ba sira

Vendedór faan ikan iha Taibesi ejize Governu kria kondisaun ba sira

Menus fasilidade iha fatin faan ikan la ijinee, vendedor sira la faan ikan iha merkadu Taibesi, sesta (19 janeiru 2024). Imajen Foto Tatoli/Antonio Daciparu.

DILI, 19 dezembru 2024 (TATOLI)–Vendedór faan ikan iha merkadu Taibesi husu Sekretaria Estadu Asuntu Toponimia no Organizasaun Urbana (SEATOU) ho Autoridade Munisípiu Dili (AMD) atu kria kondisaun ba sira, tanba laiha kanalizasaun bee no faan mós ikan la folin.

Portavóz vendedór ikan, Cesário Martins, hateten grupu aileba ikan sente la satisfas ba aktu ne’ebé IX Governu Konstitusional liuhosi SEATOU no AMD halo eviksaun forsadamente ba nia vendedór ikan iha Bidau Santana hodi muda ba merkadu Taibese iha 08 janeiru 2023, maibé Autoridade Munisípiu Dili la kria kondisaun dignu ba vendedór ikan.

Tuir nia, fatin faan ikan iha tasi ibun Bidau Santana di’ak-liu hodi vendedór ikan sira bele utiliza, tanba dook hosi komunidade no kompradór sira fásil atu asesu.

“Karik manten faan ikan iha merkadu Taibesi mak sei prejudika ami vendedór sira-nia rendimentu no afeta ba ekonomia familia. Fatin la asesivel ba kompradór no ikan sira dodok, la ijene tanba sistema lixu di’ak,” nia dehan.

Sira lamenta tebes ba eviksaun ida-ne’e, tanba sei afeta ba sira-nia moris no prejudika vendedór tomak nia rendimentu no ekonomia.

Sira ezije atu rekonsidera desizaun ne’e no, sujere atu ajuda organiza merkadu ikan iha Bidau Santana duké muda ba Taibesi ka fatin seluk.

Nia husu ba Ministériu Agrikultura Pecuaria, Peska no Floresta, Ministériu do Komérsiu E Indústria no Autoridade Munisipiu Dili hodi rekonstrusaun ba merkadu ikan nia iha área tasi ibun Bidau Santana.

Vendedór sira foti inisiativa servisu rasik ba sira-nia aan hodi sustenta familia liuhosi faan ikan, maibé Governu taka dalan ba sira no la konsidera sira nu’udar ema.

Nia husu ba Prezidente Repúblika, Parlamentu Nasionál, Primeiru-Ministru no ministériu relevante sira hodi bele rona vendedór sira-nia lian, tanba moris hela iha risku laran.

Hatan ba preokupasaun ne’e, Diretór Servisu Munisipál Jestaun Merkadu no Turizmu Munisípiu Dili, Arthur Henriques, hateten vendedór sira buka de’it razaun kondisaun laiha atu faan iha tasi ibun.

“Sira hakarak buka di’ak de’it, sira ba tasi ibun ne’e kondisaun di’ak ka. Merkadu Taibesi ne’e saida mak ladi’ak. Portaun, bee iha no haris fatin iha, nusa mak sira hakarak ba tasi ibun. Kondisaun laiha ne’e razaun sira uza atu faan iha tasi ibun ne’ebá. Bee foin ita enxe ne’e iha tempu udan, tamba ne’e merak, iha tasi ibun fase ho tasi-been,” nia hateten ba Agência Tatoli, sesta ne’e.

Nia refere, semana-semana Bombeiros ho saneamentu fornese bee ba iha merkadu Taibesi no agora hein tan atu monta tanki bomba bee iha fulan marsu ne’e nia laran.

“Sei garante di’ak, ita labele ansi buat hotu lalais de’it tanba sira foin ba faan semana ida. AMD sei hadi’a di’ak-liu iha tinan ne’e. Ami apoiu bee ba sira litru rihun 10 ba sira depende ba sira uza,” nia dehan.

Husu kona-ba fatin faan ikan iha tasi ibun ba vendedór sira, nia hatán, Governu sei sobu hotu hodi tau postu foun ida iha ne’eba.

Maibé, tuir observasaun Tatoli iha terreniu, bee-foer naliun barak hela iha valeta no lixu lekar ba-mai ne’ebé hamosu iis desgradavel ba vendedór no kompradór sira iha merkadu Taibesi, no ida ne’e bele afeta bae ma-nia saúde.

Vendedór faan ikan ne’ebé AMD ho SEATOU muda hosi tasi ibun Bidau Santana ba merkadu Taibesi ne’e hamutuk ema 21.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!