DILI, 22 janeiru 2024 (TATOLI)—Deputada PD, Maria Teresa Gusmão, husu parte kompetente atu halo investigasaun ba tripulante ró Berlin Nakroma no Berlin Ramelau.
Notísia Relevante: APORTIL hahú rekruta tripulante timor-oan ba Ró Nakroma 2
“Ohin, ha’u hakarak foti asuntu kona-ba iregularidade ruma ne’ebé akontese iha ró Berlin Nakroma no Berlin Ramelau. Tuir informasaun ne’ebé ami asesu hosi asosiasaun mariñeriu Timor-Leste identifika katak, tripulante hosi ró no pasajeiru hosi ró rua ne’e hala’o atividade negósiu kuartu ba pasajeiru, maske ró sira ne’e hanesan propriedade Estadu niian,” Deputada PD ne’e levanta liuhosi reuniaun plenária PN, segunda ne’e.
Nia dehan, tripulante ne’ebé halo negósiu ne’e maiória hosi nasaun Indonézia inklui mós tripulante timoroan balun, mezmu iha ró Berlin Ramelau nia kontratu la fó autorizasaun ba tripulante sira atu faan kuartu ba pasajeiru sira.
“Maibé tripulante sira la preokupa no pesoál APORTIL sira mós hatene no haree hela maibé finje lahatene buat ida, tuir informasaun tripulante ne’ebé toba iha kuartu ospitál nian mós faan kuartu refere ba pasajeiru, maske iha sasán medikamentu nakonu hela no fatin ne’e mós uza ba atendimentu ema moras nian, maibé sira utiliza hodi halo hotu negósiu,” nia dehan.
Deputada hosi bankada Governu ne’e hateten, kada kuartu tripulante sira fó aluga ba pasajeiru ho montante $50 ba kada viajen, maske tripulante sira-ne’e hetan vensimentu besik $2000 no balun liu.
Tuir loloos ro ne’e propriedade Estadu nian, ema hirak ne’ebé serbisu iha ró hetan saláriu mensál, tanba ne’e laiha razaun atu faan ka fó aluga kuartu ba pasajeiru sira no kuartu ne’e tripulante sira uza hodi deskansa di’ak, nune’e bele asegura ró no viajen sira-ne’ebé sira hala’o.
“Husu ba CAC, PCIC, ministériu kompetente ka komisaun Parlamentu Nasionál atu haree kestaun ida-ne’e ho sériu atu labele akontese tan iha instituisaun Estadu nian,” nia dehan.
Nia husu ba Vise Ministru Parlamentár atu envia relevante atu tau atensaun sériu ba kestaun ne’e.
Vise Ministru ba asuntu Parlamentár, Adérito Hugo da Costa, rejista preokupasaun Deputada husi bankada PD no sei envia ministériu tutela atu fó resposta.
Jornalista : Nelson de Sousa
Editór : Cancio Ximenes
