DILI, 22 janeiru 2024 (TATOLI) – Sekretáriu Jerál Federasaun Futeból Timor-Leste (FFTL), Gregorio Correia, dehan kongresu ne’e sei hein desizaun hosi Federation International Football Asosiation (FIFA) tanba orsamentu.
“Kongresu atu hala’o fali tenke hein fali FIFA no sei fó desizaun liuhosi karta ida mai mak ita sei hala’o fali”, Sekretáriu Jerál hateten ba Agência TATOLI iha edifísiu FFTL, ohin.
Rekorda falai katak kongresu FFTL ne’ebé hala’o iha (10/01) lá konsege hili estrutura foun tanba mosu dezentendimentu hosi kongresista sira ne’ebé impede kongresu no la konsege avansa ba votasaun hili hodi estrutura foun.
Iha kongresu, antes ne’e Asosiasaun Futeból sira deside figura na’in-rua mak Francisco Kalbuadi Lay no Nilton Telmo Gusmão.
Ho dezentendimentu ne’e halo kandidatura Nilton Gusmão deside hodi rezigna-aan hosi nia kandidatura ho nune’e kongresu tenke para.
Kongresu ne’e mosu tanba iha tinan 2023 ba kotuk Asosiasaun Futeból sira hotu halo protesta hasoru Prezidente sesante Francisco Jerónimo no noa tenke rejigna aan hosi nia kargu.
Bainhira Francisco Jerónimo rejiga aan tuir estatutu FFTL nian fó dalan ba komisaun iha FFTL realiza hikas kongresu hodi hili estrutura foun hodi lidera FFTL durante mandatu tinan haat.
Kongresu FFTL aprova regulamentu interna, estrutura foun no desizaun saida de’it só Asosiasaun Futeból de’it mak iha direitu absoluta.
Asosiasaun Futeból sira mak hanesan, Dili Leste, Dili Oeste, Baucau, Ainaro, Aileu, Manufahu, Ermera, Bobonaro, Manatuto, Lautem, Covalima, Viqueque, Liquiça, RAEOA, Sentru Juveníl, Assosiasaun Treinadór, Arbitrajen, Asosiasaun Futeból Femenina, Asosiasaun Futsál Timor-Leste no klube Liga Futeból Timor-Leste (LFTL) kampiaun primeira divizaun segunda divizaun.
Jornalista: Hortencio Sanchez
Editór : Zezito Silva
