DILI, 22 janeiru 2024 (TATOLI)—Ministériu Transporte no Komunikasaun (MTK) liuhosi Diresaun Nasionál Transporte Terrestre (DNTT), tinan ne’e, sei reabilita parajen transporte públiku (halte) hamutuk 16 iha kapitál Dili, ne’ebé antes ne’e harii iha tempu Indonézia.
Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, hateten, daudaun ne’e ekipa téknika halo hela levantamentu dadus atu reativa parajen sira.
“Ita-nia Departamentu Tráfiku Rodaviáriu identifika ona parajen transporte públiku antigu 16, ne’ebé ita sei reativa iha tinan ne’e, tanba tama hotu iha planu prioridade 2024,” Nelson Sequeira Martins, informa foin lalais ne’e, iha ninia knaar fatin, DNTT, Balide.
Notísia relevante : DNTT planeia reativa parajen antigu ba transporte públiku
DNTT sei haree fatin sira ne’ebé sai prioridade, hanesan movimentu komunidade no transporte barak.
Objetivu tau prioridade hadi’a parajen transporte públiku iha tinan ne’e tanba hakarak eduka komunidade hodi hein transporte hanesan taxi no bemo iha halte no kondutór sira mós hanesan, atu tula pasajeiru tenke tula iha halte.
“Ba bus sira para hotu iha terminál de’it mak tula pasajeiru, ida-ne’e sira la tama mai iha Dili laran, ba oin mós ita sei hasai regulamentu atu bus sira halai ba munisípiu tenke l laron de’it ona, labele halai kalan hodi evita asidente,” nia tenik.
DNTT prevee orsamentu atu hadi’a halte hamutuk $140.000.
Joranlista : Arminda Fonseca
Editora : Julia Chatarina
