iklan

MUNISÍPIU, SAÚDE, VIQUEQUE

Pesoál saúde kontratadu 35 kontinua servisu voluntária iha sentru saúde Viqueque Vila

Pesoál saúde kontratadu 35 kontinua servisu voluntária iha sentru saúde Viqueque Vila

Xefe sentru saúde Vqueque Vila, Cestina da Costa Alves. Imajén Tatoli/Vitorino Lopes Costa

VIQUEQUE, 22 janeiru 2024 (TATOLI)-Xefe Sentru Saúde Viqueque Vila, Celestina da Costa Alves, informa, pesoál saúde kontratadu na’in-35 ne’ebé loloos kontratu termina ona iha 31 dezembru 2023, maibé daudaun kontinua voluntária hodi fó atendimentu ba pasiente sira iha postu saúde Viqueque Vila, munisípiu Viqueque.

“Ami Sentru Saúde postu Viqueque Vila iha postu saúde hamutuk 12 no pesoál saúde kontratadu na’in-35 kontratu hotu, maibé agora daudaun sira kontinua apoia ami hodi halo atendimentu ba ita-nia pasiente sira iha postu Viqueque Vila”, relata Celestina da Costa Alves, hateten ba jornalista sira, iha edifísiu Sentru Saúde Viqueque Vila, segunda ne’e.

Ho apoia voluntáriu ne’e, nia dehan daudaun atendimentu ba pasiente la’o normal, maske inisiu  kontratadu ba pesoál saúde termina fó implika ba postu saúde rua hanesan  suku Uma Uain-Kraik no suku Bileo.

“Ami destaka kedas pesoál saúde permanente ba postu rua no ami fó oráriu ba kontratadu sira-ne’ebé agora sei kontinua fó apoia ne’e. Maske sira tama servisu la’ós kada loron, maibé sira tama halo atendimentu kada semana tama loron rua de’it hodi kontinua hein desizaun husi Ministériu Saúde”, nia afirma.

Tuir nia kontratadu sira-ne’e apoia tebe-tebes ba sentru saúde no postu saúde tanba pesoal saúde na’in-35 hetan hotu ona formasaun báziku ba atendimentu pasiente nian.

“Daudaun ne’e, ami kontinua hala’o programa movél klínika no programa SISCA ne’e tama sai postu saúde atu reforsa atendimentu ba ita-nia abitante sira iha suku no postu saúde 12”, nia afirma.

Tuir dadús kontratadu pesoál saúde iha sentru saúde iha postu administrativu Viqueque Vila hamutuk 35, kompostu husi enfermeiru, saúde públika no parteira.

Jornalista : Vitorino Lopes da Costa

Editór        : Florencio Miranda Ximenes

iklan
iklan

Leave a Reply

iklan
error: Content is protected !!