Reprezentante povu husu Governu normaliza mota Laclolema-Liquiça
DILI, 22 janeiru 2024 (TATOLI)—Reprezentante povu iha uma fukun Parlamentu Nasionál (PN) liuhosi Deputada bankada FRETILIN, Maria Anabela Sávio, husu Governu liuhosi ministériu kompetente atu atensaun hodi normaliza mota Laclolema iha aldeia Kamalehohoru, suku Dato parte Liquiça.
“Hakarak foti asuntu infraestrutura nian bainhira iha loron rua liu ba halo kontaktu eleitorál iha aldeia Kanlelehoro, suku Dato parte Likisa ninian, mota Laclolema fó ameasa makaas ba komunidade ka xefe família kuaze 400 ne’ebé hela fatin no afeta mós fatin ba óleo pezadu, edifísu postu administrasaun Liquiça nian no eskola EBF 1, 2, 3 Laclolema no universidade UNPAZ,” nia levanta liuhosi reuniaun plenária PN, segunda ne’e.
Bainhira tempu udan, nia dehan, komunidade la hakmatek no labele halo movimentasaun ba-mai, tanba haree ba mota refere sai fali hanesan rai tetuk boot ida, tanba kauza hosi rai-henek no fatuk mak nakonu tiha mota laran.
Tan ne’e, pedidu hosi komunidade no líder komunitáriu sira husu Governu atu atensaun no haruka Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, IP, sigla protugés) atu halo normalizasaun, se lae fó impaktu ba movimentasaun transporte hosi Dili ba Liquiça no munisípiu seluk.
Deputada PD, Rozena Fátima Martins, husu Governu atu tau atensaun ba konstrusaun estrada iha territóriu nasionál liuliu kondisaun estrada la di’ak ligasaun postu adminitrativu Maubise, munisípiu Ainaro no postu administrativu Turiscai, munisípiu Manufahi.
Vise Ministru ba asuntu Parlamentár, Adértio Hugo da Costa, rejista preokupasaun Deputadu sira nian no sei hato’o ba ministériu tutela tau atensaun ba ida-ne’e.
Jornalista : Nelson de Sousa
Editór : Cancio Ximenes
