VIQUEQUE, 23 janeiru 2024 (TATOLI)– Koodenadór Bee Timor Leste, Empreza Públiku (BTL.EP) Munisipiu Viqueque, Marito da Costa, husu ba empreza Timorindo Unip,Lda atu kontinua projetu sistema melloramentu dada bee-moos ba postu Lacluta tanba abandona ona kuaze tinan ida.
“Projetu dada bee-moos ba postu Lacluta, ami haree empreza Timor Rindo Unip Lda, maka sai responsavél, maibé kuaze tinan ida ona abandona servisu ho razaun saida ami munisípiu mós la hatene no autoridade postu Lacluta mós hein empreza, maibé to’o agora la mosu ba postu ne’ebá hodi fó infomasaun ba autoridade sira kona-ba razaun abandona projetu ne’e”, hatete Marito da Costa, ba Agência Tatoli, iha postu Viqueque Vila, tersa ne’e.
Projetu ne’e, nia dehan atu konstrui tanke ida iha Bee-matan, tanke distribuisaun tolu, kanu tramisaun no kanu distribuisaun ba uma-kain sira.
“Ita haree dadadaun empreza abandona servisu ne’ebé ami munisípiu labele halo buat ruma, projetu ne’e BTL.EP Nasionál maka bele halo koordenasaun ho empreza tanba sa maka abandona, nune’e bele fó xamada ba empreza atubele kontinua sira nian servisu”, nia afirma.
Tanba, nia afirma projetu ne’e abandonadu fó implikasaun ba abitante sira tanba la asesu bee moos.
“Ha’u hanoin ida-ne’e fó impaktu ba ita-nia abitante sira iha postu Lacluta tanba durante abitante sira hein hela obra ne’e hotu, sira bele asesu ona bee-moos. Maibé reallidade agora empreza abandona tiha servisu”, nia haktuir.
Projetu ne’e implementa iha tinan 2022, husi insiu ne’e empreza transporta materiál ba fatin projetu, maibé hotu la serbisu, nune’e tinan 2023 tomak empreza la halo serbisu.
Projetu ne’e atu dada ka mellora sistema bee-moos ba postu Lacluta Vila hosi suku Bibileo hun ho distánsia purvolta kilómetru 4,5 ho kustu $582.100.
Projetu ne’e, sei fó benifísia ba abitante sira ne’ebé hela iha postu Lacluta Vila liuliu suku Dilór ho totál populasaun 4.158 hosi uma-kain 693.
Empreza laiha finansiamentu
Hataan ba preokupasaun ne’e, Diretór Empreza Timorindo Unipesoal LDA, José Henrique, afirma, rekoñese duni durante tinan ida abandona hasaru hela dezafiu liuliu laiha finasiementu hodi halo akizasaun ba kanu no tanke distribuisaun nian tanba ne’e maka abandona projetu durante tinan ida ona.
“Dezafiu ne’ebé maka ha’u mak laiha finansiamentu ba sosa kanu no tanke distribuisaun ba uma kain 693. Ha’u tenta halo imprestimu ba banku, maibé seidauk hetan. Kuandu ha’u hetan ona fundu ha’u sei fila ba hodi finaliza projetu ne’e atu ita-nia abitante sira iha Lacluta bele asesu ba bee-moos”, nia realsa.
Ho difikuldade sira-ne’e, na’in ba empreza ne’e rekoñese abandona projetu kuaje tinan ida, maibé antes ne’e progresu ezekusaun ba projetu ne’e atinje 13%, hein kanu no take distirbuisaun.
“Ha’u mós Viqueque-oan hakarak partisipa iha prosesu dezenvolvimentu iha Viqueque, tanba de’it dezafiu husi finanseiru maka to’o agora ha’u seidauk kontinua servisu, maibé daudaun ha’u sei esforsu nafatin hodi buka dalan atu halo imprestimu fundu husi banku. karik ha’u hetan ona ba kontinua ba servisu tanba ha’u mós koordena ona ho na’in ba projetu BTL atu kontinua halo projetu ida ne’e”, nia promote.
Diretór empreza ne’e promote, maske iha dezafiu oin-oin, maibe sei buka solusaun hodi finaliza projetu ne’e iha tinan ida-ne’e.
Jornalista : Vitorino Lopes da Costa
Editór : Florencio Miranda Ximenes
