DILI, 23 janeiru 2024 (TATOLI)—Deputada PLP, Hermenegilda da Costa Laurentina, husu ba Ministériu Obra Públika (MOP) liuhosi Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) atu hamoos sedimentasaun rai-rahun iha sidade Dili, kauza hosi inundasaun foin lalais ne’e.
“Asuntu inundasaun depois udan boot iha 09 janeiru iha Dili laran hamosu inundasaun ne’ebé afeta ba komunidade. Ita haree katak agora daudaun dirasaun estrada Balide to’o iha Matadouro, rai ne’ebé bou iha estrada ninin la konsege suru sai no sai fila-fali rai-rahun makaas iha fatin refere,” nia levanta liuhosi reuniaun plenária PN, tersa ne’e.
Nia dehan, estrada protokólu Metiaut to’o iha Kristu Rei kondisaun hanesan mós, afeta ba estudante sira-ne’ebé la’o ain no mós ba povu sira liuliu povu ai-leba sira-ne’ebé faan sira-nia modo afeta tebes ba rai-rahun, agora daudaun kondisaun ne’ebé mak iha.
“Ho ida-ne’e sujere ba Ministériu Obra Públika (MOP) liuliu Institutu Jestaun Ekipamentu (IJE) atu apoiu rezolve lalais rai-rahun ne’ebé mak problema boot tebes iha ita-nia sidade Dili laran,” nia hateten.
Tuir nia, IGEADE, I.P iha ekipamentu fase estrada liuliu rai-rahun no Bombeirus mós apoiu serbisu hirak ne’e maibé depois udan boot to’o agora seidauk book aan no kontinua la rezolve situasaun rai-rahun sira-ne’ebé iha Dili laran.
Vise Ministru ba asuntu Parlamentár, Adérito Hugo da Costa, hateten iha sesaun plenária la hatán direta preokupasaun ne’ebé levanta, maibé rejista sei enkamiña ba ministériu tutela atu fó atensaun.
Jornalista : Nelson de Sousa
Editór : Cancio Ximenes
