DILI, 23 janeiru 2024 (TATOLI) – Governu Japaun apoia konstrusaun edifísiu Rádiu Televizaun Timor-Leste, Empreza Públika (RTTL, EP) ho millaun $5,9, ne’ebé projetu ne’e sei realiza iha tinan ida ne’e.
“Ami sei konstrui edifísiu foun kompletu ho estúdiu no sentru formasaun ida ba funsionáriu RTTL nian atu sira bele utiliza ba atividade formasaun sira iha futuru’’, embaixadór nipóniku, Tetsuya Kimura, informa hafoin sorumutu ho Sekretáriu Estadu Komunikasaun Sosil (SEKOMS), Expedito Dias Ximenes, iha Palásiu Governu, ohin.
Diplomata ne’e salienta katak obra ne’e sei implementa husi Programa Nasaun Unida ba Dezenvolvimentu (PNUD). Konkursu públiku no dezeñu detalladu no kadernu enkargu (BoQ, sigla inglés) finaliza ona no submete ona ba SEKOMS, nune’e bele hahú ona konstrusaun ne’ebé sei remata iha 2026.
Sekretáriu Estadu Expedito Dias Ximenes agradese ba Governu japonés ne’ebé durante ne’e sempre apoia Timor-Leste.
“Espera ho edifísiu foun ba RTTL, EP ne’ebé sei kompleta mós ho estúdiu no sentru formasaun ba funsionáriu RTTL, EP sira atu hetan formasaun no bele hala’o sira-nian serbisu ho fleksivel liu iha 2026’’, nia espera.
Expedito Dias iha esperansa katak sentru formasaun ne’e sei ajuda jornalista sira iha RTTL atubele hetan nafatin formasaun ho modelu reportajen investigativu, nune’e bele garante liberdade espresaun iha Timor-Leste.
Rekorde katak, iha 2022, konstrui ona edifísiu RTTL Multidimensaun ho osan rihun $700 ne’ebé to’o agora ninia konstrusaun iha hela andamentu. Obra ne’e sei finaliza iha tempu badak no ba oin sei sobu antigu edifísiu RTTL iha Caicoli hodi harii fali edifísiu foun ne’ebé hetan apoiu finanseiru husi Japaun.
Jornalista: Tomé Amado
Editora: Maria Auxiliadora
