SEAK kompromete kontinua apoia no promove joven kreativu ba arte

DILI, 23 janeiru 2024 (TATOLI) – Governu liuhosi Sekretariu Estadu Arte no Kultura (SEAK), Jorge Soares Cristovão, relata Governu nafatin tau prioridade hodi promove no apoia ba grupu joven sira iha kreatividade ba arte.

“Governu ida ne’e haree, atu promove, atu kapasita ita nia joven sira ne’ebé mak iha talentu ba arte, ida ne’e la’os foin mak atu fó apoiu ba sira, maibé iha tinan kotuk ita fó ona apoiu ba grupu arte lubuk ida atubele kapasita no eleva sira nia atividade hanesan pintura, teatru no seluk tan, ida ne’e ita kontinua tau atensaun ba sira,” hateten SEAK ba Agência TATOLI iha Faról Dili, tersa ne’e.

Objetivu apoiu Governu nian ba grupu arte kreativu hirak ne’e hodi prepara bainhira iha eventu internasionál kona-ba expozisaun arte no festivál sira bele iha ona kondisaun hodi reprezenta Timor-Leste.

“Ba futuru ita kontinua apoiu sira tanba ita iha fundu, maibé sei haree lai apoiu iha parte saida. Agora ita atu fó ba sira ne’e, sira halo jestaun di’ak ka la’e, bainhira di’ak sira nafatin hetan, grupu ne’ebé ita apoiu la’os mak Arte Moris, Gembél, dansa temporania hanesan lezevál, St. Antonio no seluk tan mak ita sei apoiu hotu grupu kreativu sira seluk,” nia kompromete.

Nia afirma: “Ita sei fó apoiu orsamentu uitoan ba sira atu jere sira nia grupu, maibé ita sei haree lai atividade ne’ebé mak sira hala’o ona, ita iha grupu ne’ebé rezistu iha notariadu ho estrutura ne’ebé estruturadu hamutuk 12, ida ne’e kompostu hosi, teatru, dansa, pintura múzika no seluk tan”.

Jornalista: Hortencio Sanchez

Editór         :    Florencio Miranda Ximenes