DILI, 24 janeiru 2024 (TATOLI)—Arkivu Nasionál Timor-Leste (ANTL) daudaun ne’e presiza tebes ema arkivista atu serbisu halo prezerva dokumentu istóriku.
“Ko’alia kona-ba serbisu arkivu nian, loloos ne’e ema arkivista mak serbisu tanba atu prezerva, konserva dokumentu istóriku no dokumentu korrente sira, maibé daudaun ita laiha ema ne’ebé espesífiku ba ida-ne’e,” Diretór Jerál ANTL, Fernando de Sousa, informa ba Agência Tatoli, iha ninia knaar fatin, Caicoli, kuarta ne’e.
Dokumentu istóriku ko’alia kona-ba dokumentu hahú hosi tempu kolónia portugés, indonéziu to’o UNTAET, enkuantu dokumentu korrente ko’alia kona-ba Governu la’o daudaun ne’e.
“Daudaun Arkivu Nasionál foti dokumentu hosi Governu dahuluk to’o dahaat, hosi Governu dalima to’o daualu nian seidauk lori mai hodi tau iha ne’e tanba espasu mak la to’o,” nia akresenta.
Notísia relevante : Estabelesimentu sentru arkivu istóriku, CNC finaliza ona pagamentu ba konsultan
Diretór dehan, daudaun ne’e seidauk iha ema ne’ebé kompetente ba área espesífiku arkivu nian iha ANTL
“Durante ne’e sira hetan treinamentu atu prezeva no konserva dokumentu ne’e hosi Brazil, Austrália no seluk tan mak fó apoiu treinamentu no sira haruka funsionáriu balun ba tuir treinamentu sistema arkivu nian iha Bali Indonézia,” nia akresenta.
Timor-Leste iha instituisaun halo konservasaun dokumentu hanesan Arkivu Muzeu Rezisténsia Timor-Leste (AMRTL) no Centro Nacional Chega (CNC), ne’ebé ninia serbisu ho ANTL la hanesan.
“AMRTL haree liu ba dokumentu no objetu rezisténsia de’it, CNC fali ezemplu konflitu iha rai ida ramata mak kria komisaun ida haree fali vítima no kria rekomendasaun, maibé ANTL ne’e úniku oituan tanba forma tiha komisaun kria tan institutuisaun Estadu ida la’o tuir segimentu sira. Tanba dokumentu ne’ebé ita rai ne’e hahú hosi tempu kolónia to’o mai agora,” Diretór esplika..
Funsionáriu ne’ebé daudaun serbisu iha laboratóriu ANTL ne’e hamutuk 14, ne’ebé hosi númeru ne’e na’in-ida permanente no seluk hanesan kazuál hotu.
Jornalista : Arminda Fonseca
Editora : Julia Chatarina
